ANG Davao City Police Office (DCPO) nagmugna og Anti-Illegal Gambling Task Force aron mas mapakusgan pa ang pagpangdakop sa mga tawo nga nalambigit sa ilegal nga sugal.
Kini ang gibutyag ni DCPO spokesperson Senior Inspector Catherine dela Rey human ilang gipaabot ang Command Memorandum Circular (CMC) gikan sa higher office sa Philippine National Police (PNP) aron giyahan kini sa mapatuman.
"Bisan og wala pa ang CMC, padayon na kitang nanakop sa mga masinupakon sa illegal gambling subay sa atong war on illegal gambling," sulti ni dela Rey atol sa Armed Forces of the Philippines-PNP press conference Miyerkules, Pebrero 15.
Subay sa talaan sa DCPO, dunay 90 ka mga tawo ang ilang nasikop sa ilegal nga sugal sa tuig 2016 ug dunay usa sa bulan sa Enero ning tuiga, apan di pa mahatag sa opisyal ang ilang sunod-sunod nga mga nadakpan karong bulan sa Pebrero nga sagad mga nagpataya og last two.
Ang Anti-Illegal Gambling Task Force gipangunahan kini Police Regional Office (PRO)-Davao Region ug ang mga city ug provincial director dunay gipagunit nga mga team leader.
Sa DCPO, si Chief Inspector Reuben Libera ang migunit sa team ubos sa superbisyon ni DCPO director Senior Superintendent Michael John Dubria.
Dugang ni dela Rey nga dunay target ang Task Force Anti-Illegal Gambling kutob Pebrero 18, 2017 nga ilang makab-ot ang pagsilbi sa 16 ka mga warrant of arrests, pagkasikop sa 18 ka mga tawo nga nalambigit sa ilegal nga pasugal, ug walo ka mga prevalent crime rate sama sa nagkadaiyang krimen nga dunay koneksyon sa sugal.
Ning bulan sa Pebrero, ang DCPO misikop og dili moubos sa lima ka mga tawo nga nalambigit sa ilegal nga sugal diin kadaghanan mga nagpataya og last two. (Jeepy P. Compio)