MASULAY ni Ruelle “Tawing” Canino ang kinataas niyang hagit sa dulang chess.
Niadtong Lunes sa hapon, Pebrero 13, nakadawat og tawag ang ginikanan ni Reulle nga sila Ruel ug Gina gikan kang Grandmaster Jason Gonzales.
Nagpahibalo si Gonzales sa ginikanan nga ipadala si Ruelle ngadto sa Fide World Schools Chess Championships karong Abril 21 paingon sa Mayo 1 didto sa Lasi, Romania.
Si Gonzales usa ka executive director sa National Chess Federation of the Philippines, ang national sports association sa nasod.
Gipili si Ruelle isip pambato sa 9-under girls alang sa RP Chess Age Group Chess Team ngadto sa World Schools Chess Championships.
Siya nagrepresentar sa nasod nga nilangkat og bulawang medalya atol sa Association of Southeast Asian Nations (Asean) Age Group Chess Championships 8-under girls niaging tuig didto sa Thailand.
Gawas sa bulawan, naangkon pa niya ang titulo nga Asean Master.
Butyag pa ni Gonzales nga sugo daw ni NCFP president Prospero Pichay nga ipadala ang top performer nga age grouper sa nasod.