NAKAANGKON og siyam ka mga samad ang usa ka mekaniko human gipusil sa usa ka traffic enforcer niadtong Martes sa hapon, Pebrero 14, sa Barangay Amoros, dakbayan sa El Salvador, Misamis Oriental.

Giila ang biktima nga mao si Crisanto Olip, 45, residente sa susamang barangay ug mekaniko sa Flywheels Motorshop.

Gitumbok nga suspetsado mao si Landilino Jaraula, 57, residente sa susamang dapit.

Ang imbestigador sa El Salvador Police Station nga si Police Officer 3 Ronald Bentic nibutyag sa SunStar SuperBalita nga nagsugod ang kasuko sa suspetsado dihang iyang gipatul-id ang iyang daot nga multicab.

Ang multicab gidala sa biktima sa ilang balay aron tul-idon ug mihatag sab og kantidad nga P1,500 ang suspetsado aron masugdan sa pagtul-id kay nipasalig man sab si Olip nga makuha kini tulo lamang ka adlaw.

Tulo ka adlaw ang nilabay gibalikan ni Jaraula ang iyang sakyanan apan moandar kini apan gakapalong gihapon hinungdan gibilin na sab sa tag-iya.

Apan dul-an usa na ka bulan daw wala gibali-bali og tul-id sa mekaniko ang sakyanan.

Hinungdan sa kapungot nga gibati ni Jaraula ug mikuha na lamang og laing mekaniko aron ipakuha ang multicab apan nakurat na usab kini dihang daw gipangkuhaan og mga piyesa ang sakyanan.

Dili na usab gakasapon ni Jaraula si Olip sa puloy-anan niini ug makita lang nga galabay-labay.

Niadtong Martes nagsapon ang duha sa usa ka tindahan sa dapit ug didto nahisgotan na usab ang multicab apan gikapungot sa suspek kay daw nagtawa-tawa lamang kini hinungdan miuli kini sa ilang balay og mikuha og kalibre .45 ug gipusil makapila ka higayon si Olip.

Nakaangkon ang biktima og samad pinusilan sa iyang ulo, dughan ug liog nga maoy hinungdan sa kamatayon niini.

Nasikop ang suspek ug detinado na karon sa prisuhan sa El Salvador Police Station kinsa gikatakdang mag-atubang og kasong murder lakip ang illegal possession of firearms tungod kay walay lisensya ang armas niini.

Matud sab ni Bentic nga desidido ang pamilya sa biktima nga pasakaan og kaso gumikan kay dili tiaw ang gihimo niini ug daw mabaw ra ang rason sa pagpusil.