MALAMPUSONG nasikop ang usa ka lalaki sa sunod-sunod nga nahitabong krimen human nasapon nga nagsimhot og vulcaseal sa JR Borja Street, Barangay 38 ning dakbayan sa Cagayan de Oro.

Ang suspetsado naila nga si Marvin Madera, 18, residente sa Piaping Puti, Barangay Macabalan ning dakbayan.

Sa impormasyon nga nahipos gikan sa Police Station 2 sa Cogon gikabutyag nga nasikop sa operatiba sa maong estasyon ang suspek human nga nasapon nga nagsimhot-simhot og vulcaseal.

Giingong atol sa maong pagkasikop gisusi ang lawas niini ug nakuhaan kini og kitchen knife nga adunay gitas-on nga 11.5 pulgada lakip na ang puloan diha sa iyang kilid.

Gidugang pa nga ang maong dinakpan nahilambigit sa sunod-sunod nga mga krimen ilabi na ang pagpanglabni, pagpanulis o tutok kalawit ug bukas kotse sa nagkadaiyang dapit ning dakbayan.

Sa pagkakaron, ang maong suspek ang kasamtangang nagtingkagol na sa mini-cell sa Police Station 2 sa Cogon.