SUKAD nga giablihan sa publiko ang 10000 Roses Cafe sa lungsod sa Cordova niadtong Pebrero 6, liboan na nga nakuryuso ug nibisita na niini.

Mas nakadani sa mga tawo ang pagbisita niini tungod kay ang selfie, date uban sa imung hinigugma ug pagkuha og unlimited nga hulagway sa mga LED Roses libre man dinhi.

Nisikat ang atraksyon tungod sab kay atong gisaulog ang Valentine’s Day ning bag-o lang.

Ang LED roses sa cafe mosiga kon gabii; ang mga rosas inspirado gikan sa Dongdaemun Design Plaza sa Dong­daemun, Seoul, sa South Korea.

Apan sukad nga giablihan ang atrak­syon, nitumaw sab ang mga problema nga wa damha sa lokal nga kagamhanan sa Cordova ug management sa cafe.

Matod ni Mayor Mary Therese S­i­toy-Cho sa pakighinabi sa Superba­lita Cebu nga tulo sa mga dagkong problema nga ilang nasugatan mao ang grabeng kahuot sa trapiko paingon sa Day-as, seguridad ug pagpasagad og labay sa basura sa dagat sa mga nibisita.

Kini maoy hinungdan nga mopaba­yad og P20 nga environmental fee ang kagamhanan sa Cordova nga nagsugod atol sa Valentine’s Day.

“Na-observe man gud namu nga dag­han kaayo og nanglabay og basura (sa dagat) unya we really need more traffic enforcers, so we need money para makagasto aning tanan pud sa maintenance ug support, so magpa- environmental fee mi,” padayag ni Sitoy-Cho ning mantalaan.

Paambit niya nga atraksyon nahimo pinaagi sa joint-venture agreement sa lungsod ug Cordova-Cebu Golf and Resort Corp. nga giaprobahan sa konseho sa lungsod niadtong 2014 ug nalakip na sa kasabutan ang environmental fee nga gipahamtang.

Niadtong Dominggo, natala sa ka­gamhanan sa lungsod nga sobra sa 30,000 ka mga tawo ang nitan-aw sa mga rosas ug si Miguel Cho, anak sa bana ni Sitoy-Cho ug manager sa cafe nagkanayon nga mga 500 ka LED roses ang naguba niadtong adlawa.

Pahinumdum

Ang panglantaw ni Cho sa cafe nga mahimo ki­ning usa ka romantikong lu­gar nga a­­­lang sa tanan.

Si Cho nagkanayon nga iya ra nga maayo ang mga danyos sa mga rosas apan kini nihangyo nga di lang unta gub-on sa mga mobisita.

Di na unya nila pahikapan ang mga LED nga rosas ug labawng di pasudlan ang luna diin giugsok ang mga artificial nga buwak aron di maguba.

Tips

Sa mga mobisita didto, ang P20 nga environmental fee didto bayaran sa tourism office sa munisipyo di sa Day-as.

Di makasud ang way official receipt gikan sa munisipyo kay may kawani sa tourism office ang moinspeksyon niini dapit sa cafe.

Si Mayor Sitoy-Cho niingon nga ila kining gituyo aron nga ilang makontrolar ang dasok sa mga tawo ug trapik sa sakyanan sa dapit.

Si Tourism Officer Guinever Jumao-as-Flores niingon sab nga ilang pakigtagboan ang presidente sa traysikad drayber nunot sa taho nga nitaas ang pangayo nga plite niini sa mga pasahero.

Ilakip sab unya nila sa ilang meeting ang kalit nga pagdaghan sa mga habal-habal sa dapit nga nihit niadto ug mahal ang pangayuong plite sa mga pasahero.

Ang labing nindot nga oras sa pagbisita didto mao ang atol sa pagsawop sa adlaw tungod kay ining mga gutlua pasigaon man ang mga rosas.

Mas bugnaw ang palibot ug nindot tan-awon ang mga rosas kon gabii ilabi na ug kini huyupon sa hangin.

Sa mga buot mobisita sa dapit, mas maayo nga magdala kamo ug kaugali­ngong sakyanan didto ug sa kadtong mag-commute, mas maayo nga mosayo kamo aron dali kamo maabot didto ug malikayan ang trapik.

“I’m very thankful nga na-appreciate nila ang 10000 Roses that we do not expect pud nga gubutan ug dagsaan sa mga tawo,” matod ni Sitoy-Cho.