GIPUTOL ni Cebu City Mayor Tomas Osmeña ang paghatag og cash allowance sa tanang mga barangay tanods ug garbage loaders sa syudad sugod niadtong Pebrero 1.

Adunay 80 ka mga barangay ang syudad sa Sugbo. Ang matag barangay adunay labing menos 20 ka mga barangay tanod, busa mokabat sa 1,600 ka mga barangay tanod mga mappektohan niini.

Wa kita masayod kon tagpila ka buok ang mga garbage loaders sa matag barangay. Ang klaro nga giundang na sa gobyerno sa syudad ang paghatag sa ilang binuwan nga allowance.

***

Si Osmeña niingon nga ang hinungdan sa pag-undang sa cash allowance sa mga tanod ug mga loader mao ang budgetary constraints. Nagkalisod na diay ang panudlanan sa syudad sa Sugbo?

Mao ba kini ang hinungdan nga dunay lakang nga magbaligya og laing lote sa South Road Properties? Pero kining allowance sa mga tanod ug loader sa basura apil na man kaha kini sa tinuig nga budget karong tuiga?

Ang matag tanod makadawat og P4,000 matag buwan gikan sa syudad samtang ang mga loader tag P5,000 ang buwan.

***

Si Konsehal Philip Zafra, pangulo sa Association of Barangay Councils (ABC) ug barangay kapitan sa Tisa, niingon nga ang executive department nisukip og P115 milyunes alang sa allowance sa mga tanod ug laing P50.4 milyunes nga allowance sa mga loaders sa tinuig nga budget karong tuiga.

Hain man padulong kining maong budget nga nakaingon man ang mayor nga iyang giputol ang allowance sa mga tanod ug loader tungod sa budgetary constraints?

Ang syudad bag-o lang nanghatag og financial assistance sa kapin sa 67,000 ka mga senior citizens nga tag P2,000 matag usa. Mao ba kanay gitawag og budgetary constraints?

***

Sumala sa mga reklamo nga atong nadawat, dunay mga barangay sa syudad kansang mga tanod wa pa hatagi sa ilang allowance sukad pa sa buwan sa Hulyo sa miaging tuig.

Matod pa sa usa ka tanod nga atong nahinabi, “Unsa pa may putlon nga miabot na man gani og kapin sa unom ka buwan nga wa mi hatagi sa among allowance gikan sa syudad?”

Pero dunay mga barangay nga pinangga  sa mayor. Pirmi hatagan sa ilang mga allowance ang ilang mga tanod ug mga garbage loader. Pero budgetary constraints man kaha. Mao nang bayloan ang basura nga ihatod sa trak og sardinas aron wad-on na ang mga loaders.