KULBAHINAM ning nagpadayon karon nga semifinals round sa PBA Philippine Cup didto sa Kaulohan. Tiaw mo bay pulos natabla karon ang best-of-seven series, 2-2, sa duha ka semis match.

Ning pagsuwat ning atong lindog, nagduwa pa ang TNT Katropa ug San Miguel Beer sa Game 5 sa ilang serya.

Karong gabii, turno na usab sa Barangay Ginebra ug sa Star Hotshots sa pagsiak sa ilang 2-2 nga panagtabla.

Kon kinsa ang makakuha sa Game 5, dako’g porsiyento nga mao usab kini ang makasakmit og lingkuranan sa finals.

Diha na unta sa wanang nga dalan ang Hotshots sa sayong bahin sa serya kay akaposte na sila og 2-0 nga bintaha, apan gisagunsonan man sila sa pagbawos sa dihang napukan na usab sila sa Game 4 niadtong Miyerkules.

Pero taympa una. Mora man og daghang diskompiyado sa kadaugan sa Ginebra niadtong Miyerkules.

Di ko masurprisa kon duna na unya puy laing mga player nga pamultahon sa commissioner’s office tungod sa ilang pagsaway sa officiating.

Usa na niini si Allen Maliksi, ang shooting guard sa Hotshots kinsa mipasumbingay nga dunay “cooking” o “lutong Macao” nga nahitabo sa maong duwa.

Si Marc Pingris, ang power-forward sa Star, morag misuporta usab sa maong pasumbingay. Posibling si coach Chito Victolero maigo pud kay nakabuhi man sab og opensiba nga pamahayag.

Di lang kay ang mga fans ug ang habig sa Star ang nangreklamo kon dili pipila usab ka mga yanong tumatan-aw ang nakaobserbar sa mga tawag sa referee.

Di ko moingon nga pabor ang mga tawag ngadto sa Ginebra. Kamo na lay hukom kon unsay inyong panahom ning mosunod:

Ang Star natawagan og 36 ka fouls samtang ang Ginebra aduna lay 18. Kini maoy usa sa mga hinungdan nga ang pointguard sa Star nga si Marc Barroca sayo kaayong migradwar sa fourth quarter.

Laing upat ka Hotshots nga gipangulohan usab sa playmaker nga si Paul Lee ang na foul trouble usab sa fourth quarter.

Samtang ang Ginebra 33 ka higayon nagbalik-balik sa free throw line, ang Hotshots, kaluoy sa Diyos, ka napulo ra.

Sabtunon, pero sa gikaingon ko na, anaa ra ninyo ang paghukom kon unsay inyong nakita ug obserbasyon. Ayaw sab mo’g kasurprisa kon moabot ang series ngadto sa Game 7.

(junmigs0622@yahoo.com)