ANDOVER CITY – Sugboanong 6-anyos nga batang babaye ang mipakita og sayong pag-arangkada sa “Twin Cities Rumble” sa Oak View Midle School sa Minnesota.
Si Rhoanne Guden nangulo sa USA Karate team nga milangkat sa 1st place trophy, banner ug medal sa Mega Team Under Black Belt Traditional Forms sa 6-10 years old category.
Si Guden, anak ni Robert ug Candice Ann Tirando-Guden nga lumad nga taga Talisay, maoy bugtong Pinay ug Asian sa 16 ka team nga misalmot sa tinuig nga torneyo.
“Wala koy hilig sa Karate, akong manghod si Andrew (Tirando) lawn tennis ug akong amahan. Apan nahibulong mi nga si Rhoanne napaingon sa Karate, pero pagsugod niya giganahan gyud siya,” batbat ni Candice.
Ang mga Filipino-Americans (isip minority) nga mga bata sa US gi encourage gyud sa ilang mga ginikanan pag kat-on sa Karate aron magamit isip self defense, discipline, conditioning ug skills development.