MIPABUTO og 38 puntos si Russel Westbrook ug miposte sa iyang ika-27 nga triple-double performance sa nagpadayon nga season aron ituboy ang Oklahoma City Thunder ngadto sa 116-105 nga kadaugan batok sa New York Knicks kagahapon.

Tungod niini, si Westbrook anaa na karon sa ikatulong luna sa pinakadaghan og triple-double per­formance sa usa ka season. Si Oscar Robertson adunay 41 ka triple—double niadtong 1961-62 season ug gisundan kini sa 31 ni Wilt Chamberlain sa tuig 1967-68.

Gawas sa iyang 38 puntos, si Thunder star milabni usab og 14 ka rebounds ug 12 ka assists nga sa kinatibuk-an niyang career sa NBA maoy iyang ika-64 nga triple-double performance.

“The respect is obvious, man,” matod ni Knicks forward Carmelo Anthony. “It’s a mutual respect. Russell is like family to me. I love to see him out there doing what he is doing. I hope he can continue to do that throughout the rest of the season.”

Nagbilin si Westbrook og maayong telemad-on sa dili pa ang usa ka semanang NBA All-Star break.

“You want to have a good feeling, good taste in your mouth going into the break, and then make sure you come back ready to play,” padayag ni Westbrook.

Si Anthony kinsa maoy mopuli ni Kevin Love sa All-Star Game, nangulo sa Knicks nga may 30, midugang og 25 si Derrick Rose.

Nakuha ni Westbrook ang iyang triple-double performance sa kata­pusang siete minutos sa thrid quarter.

Ang kanhi sentro sa Thunder nga si Kendrick Perkins kinsa nakatabang og dako nga mahatod ang Thunder sa finals niadtong 2012, mitan-aw sa duwa ug giabibahan sa mga tawo. Nakadalikyat usab siya sa makadiyot sa locker room.

Sa laing kombati, nakaipsot ang Boston Celtics sa pagpanghudlat sa Philadelphia Sixers, 116-108, ubos sa pagpangulo ni Isaiah Thomas kinsa mipakatap og 33 puntos.

Kadto maoy ika-40 nga sunodsunod nga higayon nga si Thomas mipuntos og 20 o kapin pa niini diin iyang natupngan ang record nga nakulit ni John Havlicek niadtong 1971-72 season.

Ang Cleveland Cavaliers padayon usab sa ilang kainit pinaagi sa paglatos sa Indiana Pacers, 113-104, bisan pa man og wala ang usa sa ilang sinaligan nga si Kevin Love.

Si LeBron James miyagyag og 31 puntos nga gidugangan usab og 26 ni Kyrie Irving. Unom ka triples ang gihimo usab ni Kyle Korver.

Mitapos si Korver sa duwa nga may 22 puntos ug anaa karon sa ikapitong dapit sa pundok sa mga players nga may 2,000 ka triples.

Gilunggoan sa Golden State Warriors sa ilang mga ulo ang Sacramento Kings, 109-86. Sa iyang pagbalik, si Klay Thompson mipabuhagay gilayon og 35 puntos. Si Kevin Durant midugang og 21, 13 usab ang kang Stephen Curry.

Ang Houston Ro­ckets gipatugdong sa kainit sa Miami Heat, 117-109.