KAPULISAN sa Talisay nagsugod na sa ilang operasyon batok sa ilegal nga sugal nga mao ang swertres.
Una niini, si Supt. Emerson Dante, hepe sa Talisay Police Station, nibutyag nga ila na unyang sugdan ang operation sa swertres.
Mao kini hinungdan nga iyang gipahimangnoan ang illegal operators nga mohunong na sa ilang kalihukan.
Ang kapulisan hinimo sa hugot nga operasyon human nakadawat og kamandoan gikan sa ilang labaw bahin sa swertres nga walay pagtugot sa Philippines Charity Sweepstake Office (PCSO).
Sa miaging adlawa, duha ka tawo nga nalambigit sa ilegal nga sugal ang nasikop tungod sa swertres sa New Frontier Homes, Barangay Bulacao.
Ang nasikop giila nga sila si Mischelle Bacus, 27 , dalaga ug lumad nga taga Luay, Toledo City; ug Kim Arlante, 25, dalaga, lumad ug taga Can-ayoan, Malaybalay City, Bukidnon.
Ang kapulisan sa Talisay pinangulohan ni SPO3 Vicente Taladua nakadawat og taho may labot sa ilegal nga kalihukan sa duha busa ilang gilusad ang operasyon.
Nakuhaan sa kapulisan ang mga gamit para sa ilegal nga swertres ug kuwarta nga P400,00 kapin ug kulang.
Ang duha gikatakdang pasakaan og kaso.
Samtang, duha ka ilegal nga makina sab ang nasakmit sa mga operatiba sa sitio Candaya, Barangay Mohon sa susamang adlaw.
Matod pa mga menor de edad ang gikaingon nga manuwa sa maong ilegal nga makina ug wala na gidakop ug gi-turn-over ngadto sa ilang mga ginikanan.
Usa ka video karera ug molimoli nga makina ang nakuha.