PLANO sa kagamhanan sa dakbayan sa Sugbo nga mopalit og tents alang sa mga apektado nga pamilya sa bukirang barangay nga apektado sa pagdahili sa yuta.
Gibutyag ni Genevieve Alcoseba, pangu sa Division for the Welfare of the Urban Poor (DWUP), nga nasabutan sa ilang tigom kauban ang Local Housing Board nga mohimo og emergency purchase sa tents aron aduna’y temporaryo nga kasilungan o kapuy-an ang apektado nga mga pamilya.
Sa Barangay Sirao, nga maoy nagrabehan sa pagdahili sa yuta, niabot na og 84 ka pamilya, gikan sa 26, ang apektado.
Si Alcoseba nidugang nagkadaghan ang mga pamilya nga apektado base na sa ilang pakisusi samtang padayon nag-irog ang yuta sa Sirao.
Mokabat sa 100 ka tents ang ilang paliton kon uyonan sa mayor, nga posible kuhaon sa disaster funds. apan sutaon pa nila ang legalidad niini.
Sa personal nga pakisusi si Alcoseba, tag P30,000 ang usa ka tent.
Mokabat sa P3 milyones ang balor sa usa ka gatos ka mga tulda, nga ipahuwam ra aron magamit sa laing lugar kon aduna’y demolition o sunog.
Nakiglambigit na ang DWUP sa General Services Office (GSO), aron mapangitaan og relokasyon ang mga pamilya nga apektado.
Matag pamilya hatagan og 100 square meters nga luna diin hangyo nila nga lote lang ang ilang bayaran tungod kay dili pa sila maka-afford og house and lot nga maoy gusto unta sa DWUP.
Sa pakisusi sa GSO, wala’y luna nga nasuta nga posibleng mabalhinan sa pamilya isip relokasyon sa Barangay Sirao.
Sa nasusi nga mga luna nga iya sa dakbayan sa bukirang bahin, posible sa Barangay Guba, pabalhinon og puyo ang mga pamilya, apan matod ni Alcoseba, nga ilaha pa kining ipaubos sa ocular inspection ug ipasusi sa disaster office o sa Mines and Geosciences Bureau kon luwas ba kini nga puy-an.