NAGKADAIYANG surprise drug test ang gihimo sa mga barangay tanod ug loaders sa dakbayan sa Sugbo kagahapon diin mismo si Konsehal Dave Tumulak ang na­ngulo niini.

Unang gihimo ang surprisa nga drug test sa Barangay Bulacao kini human ang ilang kapitan nakig-alayon kang Tumulak kini aron malimpyohan ang ilang barangay sa mga tawo nga nahumon sa ilegal nga drugas. 

Ang resulta sa drug test iduso ngadto kang Cebu City Mayor Tomas Osmeña sa panghinaot nga makatabang kini aron mausab ang desisyon mahitungod sa honorarium. 

Dako ang kalipay ni Bulacao Barangay Captain Rodrigo Jabellana nga gipatuman ang surprise drug test sa mga barangay tanod ug loaders tungod kay gusto niini nga limpyo ang ilang barangay tungod kay suportado nila ang kampanya ni Presidente Rodrigo Duterte batok ilegal nga drugas.

Nasuta nga nakigsabot ang kapitan sa Konsehal aron matan-aw ang sitwasyon sa iyang barangay.

Ang Bulacao aduna’y 22 ka mga barangay tanod ug pito ka loader nga napaubos sa drug test.

Subay niini, matod ni Tumulak, nga isip Chairman sa Committee on Public Order and Safety, kabahin sa iyang trabaho mao ang pagbisita sa tanang barangay sa siyudad sa Sugbo aron pagpaminaw kon unsay ilang mga problema.

Gitug-an ni Tumulak nga natuki usab nila ang memorandum nga gipagawas sa Mayor diin giputlan sa ilang honorarium ang mga tanod ug garbage collectors diin gipasabot sa konsehal ngadto nila nga lakip usab kini sa responsibilidad sa Mayor maong angayan nga ipakita ang maayong pagpanerbisyo.

Gitataw sa Konsehal ang resulta sa drug test nga gihimo iyang i-rekomendar sa Mayor sa panghinaot nga basin og i-rekonsiderar niya ang iyahang gipagawas nga memorandum.

Mahitungod sa allowance, giangkon ni kapitan Jabellana nga nakapaubos kini sa moral sa iyang mga ginsakupan tungod kay ang honorarium nga gihatag sa siyudad nga P4,000 dako og natabang kanila.