NAKATUTOK sa pagpanghipos sa mga dokumento bahin sa mga buhat, sinuwat ug kinabuhi ni anhing arsobispo Teofilo Camomot ang artsidyosesis sa Sugbo alang sa tinguha mabayaw kini pagka santos.
Si Cebu Archbishop Jose Palma nalipay nakadungog nga dunay madri nga giayo ni Camomot.
“Para nako I am happy to hear of such claims kay kon tan-awon og tinuod gud malipay kita no kung may usa ka gatos nga makaingon nga naayo, lipay gyud ta,” pahayag ni Palma.
Si Mother Rebecca Hawak, superior sa Poor Clare Monastery sa Cantilan, Surigao del Sur, gikataho nga nag-antos sa tumor sa iyang tuo nga mata dihang niduaw siya sa lubnganan ni Camomot sa Daughters of St. Therese (DST) Mother House sa Barangay Valladolid, siyudad sa Carcar.
Matod ni Palma nga unahon una nila og kumpleto ang mga dokumento nga kinahanglan iduso ngadto sa Roma sa pagka santos ni Camomot.