NAG-ANAM na'g kabalhin ang dagan sa atong panahon karon, kon sa bagay ana man gyud na. Kon imo gyung kuwentahon adunay tuig nga mas daghang bulan sa ting-init kay sa tag-ulan, ug may tuig pod nga labaw ang bulan sa ting-ulan kay sa tag-init, di ba?

Mao usab ang dagan sa atong gobyerno karong panahona. Kon atong balikan ang nangagi, nagsugod sa administrasyon ni kanhi Presidente Gloria Macapagal Arroyo (GMA), human madutli sa impeachment kuno si kanhi Presidente Joseph Estrada, nakulong kapin sa unom ka tuig, ang kaso? Plunder gumikan kay nakatigum og kuwarta gikan sa illegal gambling.

Panahon usab ni Presidente GMA, iyang gipakulong ang sundalong Antonio Trillanes kay nagrebelde batok sa gobyernong iyang gialagaran. Ang kaso rebelyon.

Gibuhian ra usab ni Arroyo si kanhi Presidente Estrada sa dihang hapit na matapus ang iyang termino pinaagi sa pag-pardon, kay wala nama'y peligro.

Segurado naman nga makatapus na sa iyang siyam ka tuig nga termino pagka- presidente.

Human sa presidential election sa 2010 sa dihang midaug si Benigno "Noynoy" Aquino sa pagka-presidente, si kanhi presidente GMA na usab ang gipakulong. Ang kaso? Plunder, gumikan sa pagasto sa P361 milyon gikan sa PCSO sa dili mao nga proyekto.

Ang suwerte, si Senador Trillanes kay gibuhian ni Presidente P-Noy bisan kon adunay kasong rebelyon.

Karon sa panahon na sa atong Presidente Rodrigo Duterte, gibuhian si kanhi PMGA kay kuno walay klarong ebidensiya, ug ang dakong kahibulongan, kay gipagawas na pod ang PDAP queen nga si Janet Lim Napoles nga konbiktado na sa lower court, life sentence sa kasong illegal detention sa pagkulong niya sa iyang ig-agaw nga si Ben Hur Luy, ug pagpakulong na usab kang Senadora Leila de Lima.

Kon kamo'y pangutan-on, angay pa kaha ning tuhoan? Miandar pa kaha ang gahum sa hudikatura niini?

Sa akong gamay nga pangagpas mora man og mga personalan na. Dili na katuhoan kon tinuod ba gayud nga nakasala ang usa ka tawo nga ilang gipakulong?

Insakto gyud ang pulong nga gigamit sa ABS-CBN weather reporter nga si Kim Atienza nga "WEATHER WEATHER LANG". Bisa'g magpustahanay pa ta'g usa ka libo ug siyete mil, inigkatapus sa termino ni Presidente Duterte makabuhi na pod ni si Senadora De Lima, ug aduna na usa'y makulong sa pipila ka sakop sa gabinete ni Presidente Duterte.

Pangutana lang, asa naman ang gahum sa atong Judiciary karon? Nga gi-upawan naman sa gahum sa Executive? Laliman ka, konbiktado na sa lower court, masulot pa sa gahum sa Executive? Nanguta lang.