DAVAO OCCIDENTAL -- Giabisohan na sa Philippine Coast Guard (PCG) ang mga mananagat ilabi na ang mga gagmay'ng sakyanang pangdagat nga di una mopalawod tungod sa dagkung balud nga hatud sa hanging amihan.
Kahibaloang sukad niadtong Dominggo sa hapon, kalit midako ang balud sa dagat nga miresulta sa pagbakwit sa mga molupyong nanimuyo daplin sa baybayon.
Apil nga naguba ang seawall sa lugar human mihapak ang dagkung balud.
Padayong giatiman sa lokal nga gobyerno sa lungsod sa Malita ang 360 ka mga indibiduwal nga gipahimutang sa mga evacuation centers.
Apektado na sab ang panginabuhian sa mga mananagat human gidid-an sa PCG nga mopalawod tungod sa dagkung balud.
Ang mananagat nga si Florencio, nabalaka nga wa nay ipakaon sa iyang pamilya human dili siya makapanagat og isda tungod sa daut nga panahon.
Apan gipasalig ni Mayor Bradley Bautista nga mohatag og ayudang pinansiyal ang lokal nga gobyerno aron dili mabalda ang panginabuhian sa mga apektadong pamilya.
Bisan si Governor Claude Bautista nagmando na sa Provincial Disaster Risk Reduction and Management Council (PDRRMC) nga sutaon ang kahimtang sa mga biktima ilabi na ang mga nawad-an og balay human giguba sa balud.
Gipaneguro sab sa gobernador nga way kinabuhing maangol o makalas atol sa paghapak sa kusog nga balud mao nga wa una gipabalik ang mga molupyo sa ilang mga pinuy-anan.
Dili pa masuta sa PDRMMC kon pila ang danyos sa kalamidad samtang padayon ang ilang pag-monitor sa lugar.
Sa pikas bahin, gitay-og og magnitude 4.5 nga linog ang lungsod sa Sarangani, Davao Occidental niadtong Miyerkules sa gabii, segun sa taho sa Philippine Institute of Volcanology and Seismology.
Apan giklaro sa PDRRMC nga way natalang danyos o nakalas nga kinabuhi atol sa linog. (Orlando B. Dinoy)