HUMAN gipasanginlan ni Senador Antonio Trillanes IV nga si Pangulong Rodrigo Duterte dunay kapin P2 bilyones nga pundo sa bangko lakip na P121 milyones nga joint account sa iyang anak nga si Davao City Mayor Sara Duterte-Carpio, ang mayor nagsulti nga kung tinuod ang pasangil, iyang ipanghatag ang maong salapi.
"Wala akong postura labas sa kung ano ang nakikita ng lahat. I never pretended to be what I am not. If Trillanes can show where my alleged P121 million is right now and how it became illegal, kunin natin at ibigay ko sa inyo lahat," suma ni Mayor Duterte-Carpio sa mensahe nga gipadala sa mga sakop sa media kagahapon.
"I read the press statement of Trillanes and the challenge to answer the allegations was addressed to the President. Let us allow PRD to decide on how he wants this issue to go down," dugang sa mayor.
Namulong sa mga tigbalita, si Presidential Spokesperson Ernesto Abella nagsulti nga ang alegasyon ni Trillanes, nga gipagawas niadtong milabay nga eleksyon, natubag na kini.
Si Abella nagtawag sa uwahing batikos ni Trillanes, nga kritiko ni Duterte, kabahin lang sa pagsaba-saba sa politika.
“It’s a rehash of items that have already been discussed three days before elections. Basically, he’s bringing up old issues,” suma ni Abella.
“This [allegation against the President] is part of the noise of political landscape,” dugang niya.
Ang presidential spokesperson nagsulti nga si Trillanes mas maayo moadto sa hustong awtoridad ug isumite ang mga dokumento nga iyang nakuha batok ni Duterte.
Si Abella nagsulti sab nga di tinuod ang pasangil ni Trillanes nga ang Pangulo naglaraw sa pagpatay kaniya.
Sayo niini, si Trillanes nanawagan ni Duterte nga pamatud-an nga di siya kurakot nga opisyal sa gobyerno nga wa siyay binilyon nga salapi sa bangko.
Gipasanginlan sab sa Senador nga dunay dul-an P200 milyones nga deposito sa bangko ang kapuyo sa Pangulo.
Ang Senador nagsulti usab nga kung iyang alegasyon mapamatud-an nga di tinuod, mo-resayn siya.
Si Trillanes nagbulgar niadtong Abril 2016 nga si Duterte dunay P211 million nga wa gideklara nga pundo nga naa sa joint account sa iyang anak, Davao City Mayor Sara Duterte, sa Bank of the Philippine Islands–Julia Vargas Avenue branch sa Pasig City.
Siya usab nagsulti nga si Duterte dunay bank transactions nga nikabat sa P2.406 billion sa 17 ka mga accounts sa tulo ka bangko gikan sa 2006 nagdto 2015. (Alger P. Dura/SunStar Philippines)