GATUSAN ka mga pamilya ang namakwit tungod sa baha nga nasinati tungod sa daut nga panahon sa Davao Region Huwebes sa buntag, Pebrero 16.

Human mihugpa ang tubig baha, nakasinati na sab ang dakbayan sa Davao og magnitude 4.1 nga linog nga nitay-og sab sa Digos City, Davao del Sur, alas 2:27 sa hapon.

Ang Philippine Institute of Volcanology and Seismology (Phivolcs) nagtala sa epicenter sa linog nga 14 kilometros sa amihanangsidlakan sa Digos City, ug dunay gilawmon nga 17 kilometros.

Ang linog nasinati nga Intensity IV sa Digos City, Davao del Sur ug Davao City, Intensity III sa Malita, Davao Occidental ug Intensity I sa Kidapawan City.

Sa pakighinabi sa Office of Civil Defense (OCD) Davao regional director Leoncio Cirunay, siya nagsulti nga ang kusog nga uwan Huwebes sa kaadlawon nakaapekto sa daghang indibiduwal sa rehiyon.

Base sa report nga ilang nakalap Huwebes sa buntag, si Cirunay nagsulti nga ang Davao City nakalista og 72 ka pamilya nga mikabat sa 350 ka indibiduwal nga gibutang sa evacuation center sa Barangay Talomo Proper samtang 79 ka pamilya nga gilangkuban sa 362 ka indibiduwal nagtapok sa Barangay Hall sa Matina Aplaya.

Sa gihimong monitoring sa kasapaan ala 1 sa hapon Huwebes, ang Lipadas miabot sa Yellow alert level, ang Talomo River naa sa Orange nga nagkinahanglan nga ipatuman ang preemptive evacuation; Matina River (Yellow); Davao River (Orange); Bunawan River (Yellow) ug Lasang River (Orange).

Dunay 151 ka pamilya (755 evacuees) sa Compostela Valley nga gibutang sa luwas nga lugar.

Ang OCD, samtang gikalap kining balita, padayon nga nagkoordinar sa ubang probinsya sa rehiyon.

Si Luz Gonzales, usa sa mga bakwit, nagdala sa iyang lima ka mga apo alas 5 sa buntag sa Matina Crossing evacuation center.

"Nanigurado lang ko og evacuate kay naguba na ang tulay sa Arroyo compound. Natagam man god mi sa una kay nakulong mi," suma niya.

Ang way puas nga pag-ulan sa dakbayan maoy nakapugos sa Office of the President nga magmandu nga kanselahon ang klase sa tanang publiko ug pribadong tunghaan sa elementarya ug sekondarya sa Davao City.

Ang lokal nga gobyerno sa Malita, Davao Occidental, Samal Island, Samal, Davao del Norte, Compostela Valley, Mati City, Davao Oriental ug Tagum City, Davao del Norte nagsuspenso usab sa ilang klase.

Ang weather forecast sa Philippine Atmospheric Geophysical and Astronomical Services Administration nga gipaguwa alas 5 sa buntag, ang rehiyon makasinati og madag-umon nga kalangitan nga dunay kusog nga pag-uwan nga makapabaha ug makapadahili sa yuta.