SOLONG nangulo ang Bulua National High school nga wala pa'y tatsa sa First Cagayan de Oro Public Schools Basketball Challenge.

Nagpakita lang ang Bulua nga nigradwar na sila sa mga hagit sukad sa mga niagi nga inter-public schools nga liga human nisirit sila og tulo ka sunodsunod nga daug sa bracket A sa high school boys division.

Halosa kutob lang sila sa wild card sa niaging liga sa Oro Speed Inter-Public School Basketball League.

“Nilambo og maayo sila kay naa ma'y consistent nga programa alang sa eskwelahang pampubliko,” ingon ni Raul Fuentes, kinsa ang tournament director.

Sulod sa ilang bracket, gipildi sa Bulua ang Kauswagan National High School sa iskor 63-44 pag-abri sa ilang kampanya.

Segundaan dayon og 37-34 nga daug kontra sa mas eksperyensadong Misamis Oriental General Comprehensive High School (Mogchs) Cavaliers.

Ila dayon giparot ang Canitoan National High School sa iskor 57-46 ug aduna nalang usa ka dulaan sa elimination round batok sa Indahag National High School aron makompleto ang ilang tanan tahas sa maong bracket.

Si Jowe Oculares mao ang usa sa ilang bitoon nga saligando nga nisakwat sa mga kadaogan sa Bulua National High School.

Sa bracket B, nagbugkos ang Carmen National High School ug ang Tablon National High School ang unang pwesto nga adunay 2-1 win-loss record matag usa.

Ang Cagayan de Oro National High School magpakita pa sa ilang gilas sa umaabot nga mga dula diin aduna pa sila'y usa ka daug ug walay pildi sa pagkakaron.