NAGBUY-OD sa dalan ang tulo ka mga patay’ng lawas sa biktima human napasok ilawom sa dumptruck ang motorsiklo nga gisakyan sa mga biktima niadtong Miyerkules, Pebrero 15, alas 9:45 sa gabii sa Vamenta Boulevard, Barangay Carmen, dakbayan sa Cagayan de Oro.
Diha-diha nga nakabsan sa kinabuhi sila si Joseph Nikko Obenza, nagmaneho sa motorsiklo nga Yamaha MX, Jason Operario ug Renante Operario.
Samtang nakalingkawas ang laing sakay nga si Jopet Lacheta human nga nakabantay ug mi-ambak atol sa hitabo.
Ang dumptruck gimaneho ni Richard Omreso, kinsa nagmaneho sa sakyanan nga Isuzu Cargo truck, residente sa Talakag, Bukidnon.
Sa inisyal nga imbestigasyon sa kapolisan sa Police Station 4 sa Carmen, gikabutyag nga samtang anaa sa Northbound lane sa Vamenta Boulevard aksidente niining naligsan ang stone barrier nga gibutang sa dalan nga gi-repair.
Gikabutyag nga maayong pagkapasok sa motorsiklo ngadto sa dumptruck nga miresulta sa hinanaling kamatayon sa tulo ka mga biktima kinsa nakaangkon og grabe nga mga samad sa kalawasan.
Sa pakighinabi sa SunStar SuperBalita kang Omreso, gibutyag niini nga nakurat na lamang kini sa dihang adunay milagapak ug nasayran na lamang nga aduna na’y napasok sa ilalom sa sakyanan niini.
“Sakit lang ba nga nag-amping ta unya ang uban wala, kumpleto biya mi og seminar, murag lisod kaayo dawaton nga napriso ko tungod ani,” pahayag ni Omreso.
Gidugang pa usab niini nga tungod sa pag-overtake sa maong mga biktima sa gimaneho niini nga sakyanan hinungdan sa maong aksidente gumikan kay dead end na ang maong dapit ug nilikay kini sa bangag sa maong dalan.
Gibutyag usab ni Omreso nga hinay lang ang iyang dagan niadtong higayona.
Apan nigawas ang taho nga posibleng kusog ang dagan niini tungod sa distansiya sa nahimutangan sa mga biktima ug sa dumptruck.
Samtang giangkon ni Lacheta kinsa kauban sa mga biktima nga nakalingkawas sa aksidente nga naka-inom sila.
Sa pagkakaron, kasamtangang anaa na sa Maharlika Detention Cell ang nahisgutang suspetsado.