NAGPAKITABANG ang usa ka bana human nga nasapon ang asawa nga kauban ang giingong kabit alas 12 sa tungang gabii atol sa adlaw sa managhinigugmaay sulod sa bar nga nahimutang sa Corrales Avenue ning dakbayan sa Cagayan de Oro.
Ang biktima nga bana nailang si Reymond (bansagon gitago), 35, minyo ug lumulupyo sa Barangay Canitoan ning dakbayan samtang ang asawa nag-edad og 32.
Samtang ang giingong kabit niini nailang si Mark (dili tinuod nga ngalan), kinsa usa usab matud pa ka minyo nga residente sa Carmen ning dakbayan.
Sa impormasyon nga nahipos gikan sa Police Station 1 sa Divisoria gikabutyag nga samtang gisundan sa biktima ang iyang asawa nasapon niini sa akto ang iyang asawa ug giingong kabit niini nga naglingaw-lingaw ug grabe ka sweet sulod sa bar atol sa adlaw sa mga managhinigugmaay.
Giingong gumikan lagi kay aduna na kini namatikdan nga kausaban sa lihok sa iyang asawa mao nga gipanid-an niini ug naaktohan gayud ang pag-layog layog sa asawa ug gitoohang kabit nga nailang si Mark.
Daw nabundakan sa kalibotan ang bana sa naaktohan hinungdan nga wala kini laing nahimo gawas na lamang sa pagdangop ug pagpatala sa tinugyanan sa kapolisan.
Sa pagkakaron, nakatala na sa nahisgutang estasyon ang maong insidente alang sa tukmang disposasyon.