MOKABAT sa 40 ka mga dinakpan sa kapolisan sa nagkalainlaing unit sa Cagayan de Oro City Police Office (Cocpo) ang gipresenta niadtong Miyerkules, Pebrero 15, sa Maharlika Headquarters sa Barangay Carmen, dakbayan sa Cagayan de Oro.

Unang adlaw ni Police Senior Superintendent Gerardo Rosales isip bag-ong dako sa Cocpo hulip ni Police Senior Officer Ronnie Francis Cariaga nga nadestino na sa Mimaropa Region.

Gipresenta ang 40 ka mga dinakpan sa lain-laing kaso nga gikalambigitan.

Sila ang giingong wanted person nga suspek sa pagpanglugos, pagpangawat, illegal drugs, gambling ug uban pa.

Matud ni Rosales nga sa iyang paglingkod iyang hingusgan ang peace and order sa dakbayan.

Giangkon niini nga mas nipokos ang kapolisan niaging mga bulan sa giyera batok druga apan karon nga giwala usa ilang tutukan ang uban pang mga kaso susama pagpanulis, illegal gambling ug uban pang kasupakan.

Dugang sab niini nga bout niyang dili wad-on ang police visibility sa dakbayan labina gayud ang mga police outpost sa palibot sa dakbayan. (SVB)