LUWAS nga nakabalik sa ilang puloy-anan ang upat ka mga mananagat nga na missing diha sa dakbayan sa Initao, Misamis Oriental.

Gibutyag ni Provincial Risk Reduction Management Officer Fernando Vincent Dy nga ang maong mga mananagat moabot na ngadto sa 36 ka oras kon duha ka adlaw gikan na missing dihang nanagat.

Giila ang mga survivor nga mao sila Reno Suarez, 35, Marvin Villegas, 25, John Mark Wabe, 16, ug Rezan Jaudian, 29.

Paghidangat sa lawod nga bahin gikuso-kuso sa kusog nga hangin ilang sakayan ug gilamba-lamba sa kusog nga balod.

Tungod niini mihimo og inisyatiba ang mga mananagat nga tangtangon ang ilang katig aron dili kini balihon sa balod ug nagpauyon uyon kon asa dalahon sa hangin.

Napadpad ang mga biktima sa dakbayan sa Maigo, Lanao del Sur ug niadtong Miyerkules, Pebrero 15, mga alas 11 sa buntag nahidangat nga luwas ang mga biktima.

Gisaysay sa mga biktima nga dili tiaw ilang kaagi ug labihan ang ilang kagutom nga gibati.

Hinoun ang lokal nga kagamhanan sa maong dakbayan niandam na og inisyal nga tabang alang sa maong mga mananagat samtang gikatakda usab nga kuhaon ilang pumpboat nga nabilin didto sa Lanao del Sur.