MAAYONG adlaw sa mga suki sa Sun.Star SuperBalita. Kini akong storya sa gugma, nagsugod diha sa txt-txt ug denhi pa gyod nako nakuha ang numero sa SuperBalita kaniadto.

Ako si Jasmin, 30-anyos nako karon apan 25-anyos ko dihang nangita og textmate. Nagpuyo ko denhi sa Macasandig ning siyudad sa Cagayan de Oro.

Miyembro ko kaniadto sa "NBSB" kon No boyfriend since birth hangtod nag edad nalang ko og 25 anyos. Tungod lage kay walay gapanguyab nako, mibati nako og insekyuridad sa akong kaugalingon. Nakahuman nako sa akong pagtuon ug nagsugod na sab ko og trabaho sa usa ka bangko sa siyudad.

Kay kada adlaw man gyod mi og palit og SuperBalita ug sa sige nako basa basa nipaingon akong atensyon sa mga wanted txmate. Usa lang ka cellphone number akong nagustuhan ug nakabutang nga iyang pangalan mao si Clint.

Ako ang niuna og txt. Nalipay ko nga nireply siya kanako. Nangutana pa gani ko nganong iyang gipa published iyang numero ug tubag niya nako nangita siya og mahimong kapikas sa kinabuhi kay sumo na kaayo iyang kinabuhi.

Nakurat ko nga niprangka siya og ingon sa ako nga pwede badaw mag eyeball mi. Nabalaka ko kay basin unsa iyang hitsura ug basin pod dili siya ganahan sa akoa apan misugot nalang ko.

Nagsabot mi nga magkita lang usa sa Jollibee sa Divisoria kay doul lang man sa akong gitrabahoa gawas pa nga daghan tao sa lugar sayon rako makasiyagit kung unsa iyang himoun kanako.

Insaktong alang 7:00 sa gabii nigawas ko sa akong trabahoan kay ni overtime ko ato. Tungod sa kakusog sa ulan mura kog piso nga namitpit sa kabasa. Sa pag-abot nako sa maong food chain nakita nako ang usa ka lalaki nga nakatalikod niadtong tungora. Army cut iyang buhok samtang naghupot og mahalon nga cellphone.

Ako siyang giduol og nangutana ko kung siya ba si Clint. Milingi siya kanako ug nakurat ko sa iyang hitsura, aduna siya og kapay-ong sa akong paborito nga aktor nga si Joseph Marco. Gwapohan kaayo ko sa iya. Gikilig ko og kalit.

Nakurat sab siya nga nakakita nako nga basa kaayo akong uniporme mao nga iyang gihubo ang iyang gisul-ob nga jacket ug gihatag sa akoa.

Naglingkod ming duha ug gipangutana ko kung unsay akong gusto kan-on. Naulaw gyod ko pero nagpabaga ko sa akong dagway kay gutom man pod ko.

Daghan mi giistoryahan ug nahibaw-an nako usa diay siya ka sundalo nga naa ra sa kampo nadestino ug dako nasab ang posisyon. Ako sab siya giingnan nga regular nakong teller sa usa ka bangko. Human namo og pangaon medyo ko nadismaya nga miingon siya kinahanglan na siya nga mobalik sa kampo kay igo lang siya misibat. Nalipay daw kaayo siya sa among pag-ila ila.

Sa pag uli nako sa among balay naghulat ko sa iyang text apan miabot nalang pagkaugma wala gyod siya mi-text.

Naglain na sab akong huna huna ug mibalik akong insekyuridad sa akong kaugalingon kay basin og wala siya ganahi kanako. Ako siya gisuwayan og text apan walay reply gikan kaniya.

Nagtrabaho lang gihapon ko ug gabii na dihang migawas ko sa trabahoan nakurat ko sa pagawas nako dihang nakita nako si Clint nga mihulat kanako.

Iya diay kong gisorpresa nga dili motext. Mura kog kahilakon nga nagdala pa siya og flowers para kanako. Nanglaag mi adtong gabhiona. Sa pila ka adlaw namo sige og gawas nagpadayag dayon siya sa iyang gibati kanako ug sa walay pagduha duha ako siya deretsong gisugot.

Lima ka bulan gikan sa among pag-uyab nagproposed siya og kasal kanako nga wala gyod nako gibalibaran. Karon, maglima na ka tuig among kaminyoun apan subo lang nga wala pami gihatagan og anak sa Ginoo. Padayon gihapon mi sa pag-ampo nga ihatag na kanamo.

Si Clint ang akong txmate, ug ang lalaki nga sobra nako gihigugma ang akong kapikas sa kinabuhi.

Akong huna huna kaniadto nga ang txt txt usa ka cheap nga paagi sa pakigrelasyon apan dili diay tungod kay denhi ko man gyod nakaplagan ang lalaki nga gitagana diay alang kanako.

Ako lang matambag sa uban nga swerte swerte gihapon ang pakigtxmate kay wala kita masayod nga kita gibinuangan lamang ug ang uban gihimo lang og pangload. Kung makig eyeball ayaw lang sa hilit nga lugar alang sa inyong seguridad.

Tungod sab sa akong malampuson nga relasyon kang Clint mapasalamaton kaayo ming duha sa Superbalita.