Mar Mañus, Jr.

Basak-Iba, Lapu-Lapu City, Cebu

Ayaw na ihikaw kanako

Ang mga mutya sa imong banagbanag

Kay bisan sa imong kaigmat ug kaidlas

Dili ka gayud lung-an paglutos

Sa malagsik nga lupad sa akong handurawan.

Ayaw na lagi itungina kanako

Ang mga dugos sa imong kadingding

Kining nag-alindasay kong mga langgam

Tugoti na pagpaniba

Sa mga lab-as ug mahumot mong kabulakan.

O, dili ko gayud ikaw hunongan

Sa pagpalutos ning hunahuna

Gukdon ko gayud hangtod

Sa pagsalop sa akong Adlaw

Kon dili ka man ugaling masikop

Sa mga lit-ag sa akong dagang

Bikton ko ikaw, katahoman…

O, bikton ko gayud ikaw

Sa mga malig-on nga lubing

Sa mga pintal ko ug brutsa!