Fred Nuñez Cañete

Gabi, Cordova, Cebu

Gisukot ko ang kalimot

Kon siya ba may gahom pagputol

Sa kutay sa akong mga paghandom.

Apan napakyas ako. Wa mahimo

Bisan sa paghingilin na lang

Sa akong mga daman ug salimuang.

Gihangad ko ang dughan sa langit

Milaom nga puston ang kagabhion

Sa tumang kangitngit,

Aron di ko na masud-ong

Ang sungogan nga mga anino

Diha sa akong mga damgo.

Apan ang akong naaninaw

Mao na hinuon ang naghukdong

Nga kahilom. Nga nagsapwang og

Daghang mga kamingaw.

Ah, kon mahimo pa lang

Ang mga gabii di ko na buot

Pang hibuntagan. Aron di ko na

Himat-an ang kamatuoran, nga diay

Pagkasanaw sa dalan nga akong

Gisubay. Diin sa kinatumyan atua

Ikaw: sa akong paghanduraw…!