LAHI na kaayo ang mga bag-ong tubo karon itandi kani-adto maong dili kalikayan nga usahay makahanduraw ko sa mga maanindot ug tam-is nga kagahapon.
Kaniadto magdungan og ampo ang kabanay una mangaon kay mao man kini panahon para magkatipon.
Nindot sud-ungon labi na kung ang hisgutan mahitungod sa love life kay magsungugay ug magkinataw-anay naman human sa kaon. Apan karon, kung nakamatikod ka, mag-iyahay naman lang og bitbit sa ilang mga electrotric gadgets nga itupad sa plato murag apil sa sud-an kay samtang nag-usap sa pagkaon busy ang usa ka kamot sa cellphone, ipad, ipod, tablet o laptop.
Subo kini para nako tan-awon kay imbis maka pa-ambit sa inadlaw nga kalihukan ug makapadayag sa gipangbati samtang nagkatigom, nagkalingaw naman hinuon ang matag usa sa pagduwa ug pakig-kukabildo sa uban.
Simple kaayo ang kinabuhi kaniadto.
Didto sa akong gidak-ang probinsiya sa Medellin, Cebu, ang tanang silingan kaila nako unya tawgon namo og tiya,tiyo, tita, tito, lolo ug lola bisag dili namo paryente. Way sipyat ang paghatag og respito sa mga nag-una sa duyan og pag-amin kada abot sa balay matag alas 6 sa hapon.
Kaniadto, kontento ug malipayon ra ming mga bata magduwa-duwa bisag wala mi telebisyon o electronic toys/gadgets kay kami ra may maghimo sa among duwaan. Kami ra say mo drawing sa among paper dolls, tahi sa sinena sa munyika, himo ug tabanog, kasing, luthang, panday sa among balay-balay ibabaw sa kahoy, luto-luto sa gagmay nga kolon, tinda-tinda, katkat ug sakay sa mga dagkong sanga sa kahoy nga wa igbali ang mga gasgas, hugaw, ug singot nga maani.
Kontento ra sab mi bisag way hamburger, fried chicken, french fries o Apple Pie nga balon kay ang balanghoy, kamote ug saging linung-ag, pinaypay, linusak, binignit, bachokoy, pospas ug nagka-daiyang prutas sama sa bayabas, kaymito, tambis, sinagwelas, lumboy, ug hilaw nga manga mao may among kinaham nga painit.
Human sa klase, mang-guna sa gawas ug manglimpyo sa lawak tunghaan. Magdungan sab ming mga tinun-an og lakaw- pauli kay wala may kuyaw ug samok kaniadto nga among mahibalag.
Hatagan sab mi og panahon sa among mga ginikanan nga maka duwa-duwa sa among mga silingan gikan sa dampa, takyan, dakop-dakop, luthang, bahaw-bahaw, tago-tago, paaway sa kaka, syatong, bato-lata, tubig-tubig , Chinese garter og daghan pa.
Dako akong garbo nga ako PROMDI (from the province) kay daghan ko og nindot ug malipayong kasinatian.
Hinaot nga ikaw nga nagbasa ining lindog makapa-ambit sab pagbalik sa imong kaugalingong tam-is ug maanindot nga kagahapon ngadto sa mga bag-ong tubo.