HANGTOD karon, bisan pa man sa mga reklamo ug yangongo sa mga public utility jepneey ug taxi drivers, kalabot niining grabing pagkatap sa mga nag-operate og habal-habal o motorcycle-for-hire sa bisan asang dapit, wa gihapoy aksiyon nga gihimo ang atong lokal nga pamunoan.
Sa niaging semana, si Cebu City Councilor Joel Garganera, ang chairman sa City Council Committee on Transportation, nanawagan sa executive department nga unta kahatagan kini og aksyon tungod kay nagdugang kini sa kasamok sa dagan sa trapiko.
Matod ni Garganera nga wala nay giila nga rota karon ang mga habal-habal kay gani bisan sa dalan Colon, ilabi na sa gabii, anaa kini magbahis-bahis sa maong dapit nga mangita og pasahero.
Kon kaniadto gitugotan nga kini mahimong alternatibo sa publiko o sa mga tawo niadtong mga hilit nga dapit nga dili na maabot sa mga public utility jeepney (PUJ), karon anaa na kini sa mga nag-unang kadalanan sa dakbayan nga nakigkompetensiya sa mga legal nga sakyanang pampubliko.
Mga taxi drivers mitumbok nga usa sa mga nakaapekto sa ilang inadlawng kinitaan mao kining mga habal-habal nga daw sa gipasagdan lang sa gobiyerno.
Naobserbahan usab ang pagpang-abuso sa mga drivers niini tungod kay nagpatuyang na usab kini og padako ug pagpasaka sa ilang pletihan.
Di pa lang dugay, ang Land Transportation Franchising and Regulatory Board (LTFRB) ug ang Land Transportation Office (LTO) hugot nga milusad sa ilang kampanya batok sa nga kolurom nga mga van o mga ilegal nga mga sakyanan nga namasahero.
Pipila niini ang nangasikop ug gipahamtangan og mga dagkong multa.
Pero ambot og nganong di man makapanakop ang LTFRB ug LTO niining mga habal-habal nga unta sama sa mga kolurom van wa man usab kini silay prankisa?
Nganong morag nagpakabuta-bungol man lang ang maong mga ahensiya nga plastada ra man unta kaayo kini nga makita sa kadalanan?
Kini maoy dakong tanghaga sa LTO ug LTFRB.