OPISYAL nga gilabni sa Cebu City Niños ang ika-25 niining sunodsunod nga overall title sa 2017 Central Visayas Regional Athletic Association (Cviraa) nga mitiklop kagahapon sa Enan Chiong Activity Center (Ecac) sa City of Naga, Cebu.

Sa kinatibuk-an, ang Niños nakahakot og 144 gold medals, 64 silver medals ug 77 bronze medals sa secondary ug elementary divisions.

Ang Niños adunay 102-39-46 gold-silver-bronze medal tally sa secon­dary division samtang 42-25-31 sa elementary category.

Ang labing daghang mga medalya nga naangkon sa Niños nagagikan sa gymnastics (34-18-13), swimming (32-18-17), taekwondo (15-1-5), athletics (14-7-15) ug archery (14-3-5).

Nakahakot sab og mga medalya ang Niños sa badminton (8-0-1), wrestling (7-0-0), arnis (3-6-8), tennis (3-0-1), chess (2-1-2), football (2-0-0), basketball (2-0-1), table tennis (2-3-1), volleyball (1-1-2), softball (1-0-0) ug sepak takraw (1-0-0).

“The win was an overall effort of the coaches and athletes. It takes practice to achieve what Cebu City did (winning for 25 consecutive years),” asoy ni Cebu City sports coordinator Zenaida Gocotano sa interbyu sa Sun.Star Cebu, igsuong buhatan ning mantalaan.

“I’m happy to be part of this 25th victory of Cebu City. The team will be working out for the Palarong Pambansa now.”

Ang Cebu Province maoy miangkon sa ikaduhang luna bitbit ang 37-41-47 medal tally. Dako kini nga umento sa gi­pakita sa Cebu Province kumpara sa miaging tuig diin igo lang silang nahiluna sa ikaupat dala ang 28 ka gold medals.

Ang Mandaue City midakin-as sa ikatulo dala ang 29-49-47 medal tally, ikaupat ang Bohol Province (25-38-75) samtang ang ikalima ang Lapu-Lapu City (23-35-35).

Mokompleto sa top 10 overall mao ang Tagbilaran City (21-20-25), Danao City (17-30-25), host City of Naga (7-9-19), Talisay City (6-13-14) ug Bogo City (6-4-10). Ang kompetisyon ning tuiga gikombatihan og 7,800 ka mga atleta gikan sa 13 ka divisions.