MOKABAT ngadto sa P100,000 ang natalang danyos sa pag-ulbo sa dakong kalayo kagahapon mga alas 12:50 sa Captain Vicente Roa, Barangay 30, ning siyudad sa Cagayan de Oro.

Niabot sa unang alarma ang sunog sa Cagayan DCLA Plaza nga building diin nagrenta ang Japino Surplus Trading kung asa nagsumikad ang kalayo.

Sa inisyal nga imbestigasiyon sa tinugyanan sa Bureau of Fire and Protection (BFP)-Northern Mindanao sa Cogon, nasayran nga nagsugod ang pag-ulbo sa kalayo diha sa first floor sa maong patigayon.

Matud pa nga gipanag-iyahan sa pamilya Sumahig ang maong patigayon diin mga imported ang sulod gikan sa Japan nga mga paninda.

Gisaysay sa usa ka nanag-iya sa maong patigayon nga dako na lamang ang ilang katingala ug naglibog kung asa nagsumikad ang maong kalayo tungod kay gipangunayan nila kini sa pagbantay.

Giingong sigurado kini nga walay nahabiling gisaksak nga kabtangan tungod kay kung manirado na sila ginapalong nila ang plangka.

Nasayran nga nakadungog na lamang ang guwardiya sa maong patigayon og buto-buto diin kalit nga miulbo ang kalayo.

Walay natalang naangol sa maong pag-ulbo sa dakong kalayo apan dako-dako usab ang natalang damyos tungod lage sa mga baligya sa maong patigayon.

Sa pagkakaron, padayon pa ang imbestigasiyon sa tinugyanan sa BFP aron masuta ang tinubdan sa maong sunog.