SA ikawalo nga sunodsunod nga mga tuig, makaduwa si New York Knicks forward Carmelo Anthony sa National Basketball Association (NBA) All-Star Game nga ipahigayon karong Lunes (RP time) sa New Orleans.
Si Anthony maoy napilian aron ihulip kang Cleveland Cavaliers forward Kevin Love, kinsa dili makaduwa gumikan sa angol sa iyang wa nga tuhod.
Sa kinatibuk-an, kini maoy ika-10 nga tuig nga makaduwa si Anthony sa All-Star Game.
Ning maong season, si Anthony nag-average og 23.2 puntos, 6.1 rebounds ug 2.9 assists sulod sa 55 ka mga duwa.
Sa laing bahin, si Denver Nuggets center Nikola Jokic maoy mohulip sa naangol nga si Philadelphia 76ers center Joel Embiid sa Skills Challenge nga ipahigayon ugma.
Samtang si Oklahoma City Thunder guard Alex Abrines maoy mopuli kang Embiid sa luna niini sa Rising Stars Challenge.
Ang kauban ni Anthony sa Knicks nga si center Willy Hernangomez mao sab ang mopuli sa naangol nga si Nuggets guard Emmanuel Mudiay sa World Team. AFP/ESL