KALMADONG gipasulod ni Jimmy Butler ang iyang duha ka freethrows sa nahabiling 0.9 segundos aron agakon ang host Chicago Bulls ngadto sa 104-103 nga kadaugan batok sa Boston Celtics kagahapon sa National Basketball Association (NBA).
Gikan sa 102-103 nga biya, si Butler nakahagpat og foul gikan kang Marcus Smart samtang nag-itsa nga maoy naghatod kaniya sa freethrow line alang sa iyang mabayanihong freethrows.
Sa return play, ang desperadong jumper ni Al Horford sa Celtics wala masulod.
Ang Bulls, nga ningputol sa upat ka sunodsunod nga kadaugan sa Celtics, naggukod og 10 puntos sa halftime.
Pinaagi sa 21-9 nga rally, ang Bulls nakamugna og 73-67 nga labaw sa nahabiling 4:48 minutos sa 3rd quarter. Nakaduol ang Celtics, 78-81, pagsugod sa 4th quarter.
Sikit ang kombati ning puntoha ug wala molubad ang kulbahinam hangtod na sa katapusang gutlo.
Gipangulohan ni Butler ang kadaugan pinaagi sa iyang 29 puntos samtang nidugang og 19 puntos si Bobby Portis.
Samtang ang Celtics gipangulohan ni Isaiah Thomas pinaagi sab sa iyang 29 puntos samtang nitunol og 19 puntos si Kelly Olynyk.
Wizards 111, Pacers 98
NAGPAKATAP si Otto Porter Jr. og 25 puntos lakip na niini ang unom ka three-point shots aron pangulohan ang kadaugan sa Washington Wizards batok sa host Indiana Pacers.
Nidugang og 21 puntos si Markieff Morris, nitunol og 20 puntos ug 12 assists si John Wall samtang nitampo og 19 puntos si Bradley Beal alang sa Wizards.
Ang Pacers gipangulohan nila ni Paul George ug Myles Turner pinaagi sa ilang 17 puntos matag usa. AP/ESL