ORMOC CITY, Leyte - Magsuon nga kanhi mitahan sa Oplan Tokhang, ang nadakpan sa kapulisan sa miaging adlaw.
Ang duha mao sila si Raymund ug Randy Cabahug, nagpuyo sa Barangay Monterico ning dakbayan.
Matod ni P/Insp. Rito Pallomina, hepe sa Police Station 2, mitahan na ang magsuon sa Tokhang gumikan sa pagkalambigit sa ilegal nga drugas.
Gawas niini, nakadawat usab sila og impormasyon nga ilegal nga naghupot og armas ang duha.
Sa miaging adlaw, gilusad sa Station 2 uban sa Ormoc Public Safety Company nga gipangulohan ni P/Supt. Joel Camacho, ang pag-serve sa search warrant batok sa duha sa kalapasan sa Republic Act 10591.
Milampos ang kapulisan sa pagsikop sa magsuong Cabahug ug nakuha ang nagkadaiyang ebidensya.
Naglakip kini sa kalibre .357, 4 ka bala niini ug 5 ka pakete sa gituhoang shabu nga mokabat sa 11.9 gramos nga iya ni Randy.
Nakuha usab ang usa ka kalibre .38 nga revolver ug 3 niini ka bala nga iya ni Raymund.
“Ang search warrant ay para sa firearms. Incidental nalang ang kadtong drugs. Posible nga ang drugs nga amo nakuha ang sa una pa to nga wa nila mabaligya kay tungod sa ato hugot nga kampanya against illegal drugs,” matod ni Pallomina.
Ang magsuon wa mosukol sa kapulisan atol sa operasyon ug kasamtangan gibalhog sa selda sa Station 2. Sila nag-atubang og kasong kalapasan sa Republic Act 9165 ug RA 10591.