VILLABA, Leyte - Dakog papel ang Lesbian, Gay, Bisexual ug Transgender (LGBT) sa komunidad, sumala sa usa ka opisyal.

Gipalanog ni Villaba, Leyte Konsehal Niel Inopiquez ang iyang baroganan a­lang sa mga miyembro sa LGBT.

Siya niangkon nga usa siya ka mi­yembro sa LGBT nga kaniadto nakasinati og pagpang-bully.

Bisan sa miaging eleksyon, nakasinati usab si Inopiquez ingon man ang iyang laing kaubang LGBT sa konseho ning lungsod og pagpang-bully.

“Sa miaging eleksyon, giingnan mi nga unsa ba intawon mahimo nianang miyembro sa LGBT diha sa kagamhanan. Ngano nagpadagan man tawon na?” matod ni Inopiquez.

Bisan niini, napili gihapon sila sa miaging eleksyon.

Matod niya dunay dako nga partisipasyon ang LGBT sa pagpalambo sa komunidad ug ekonomiya ug di kini angay ibaliwala.

Siya dunay panawagan sa publiko hilabi na sa mga ginikanan.

“Parents, kon duna mo anak nga inyong masabtan nga mahimong miyembro sa LGBT, ayaw ninyo pugngi. Ato hinuon suportahan ug ato tabangan. Ang usa ka miyembro sa LGBT dili angay daug daugon, kulatahon ug palayason. We also have equal rights,” pahayag ni Inopiquez atol sa gipahigayon nga labing unang Miss. Vigalesa Universe sa Villaba, Leyte.

Siya nanawagan usab nga huno­ngon na ang diskriminasyon ug stereotyping sa LGBT.

Ang pamahayag ni Inopiquez gipaluyohan ni Bise Mayor Dennis Sy.

Ang bise mayor niingon usa sa ilang gitutokan sa Villaba ang gender equality hilabi na sa LGBT nga naa gihapon ang diskriminasyon.