GIAWHAG sa opisyal sa Department of Social Welfare and Development (DSWD) 7 ang opisyal barangay nga i-activate ang tagsa-tagsa ka mga Council for the Protection of the Children aron maoy motutuk sa pagpakgang sa human trafficking.
Usa ka human trafficking ang gihimo sa usa ka Pinay ug uyab niini nga langyaw nga maoy nagpaluyo sa video nga Daisy’s Destruction.
Giingon nga nipasalig ang managtiayon nga ampingan ang mga bata apan gigamit sa ilang video aron pagpanguwarta.
Bisan kon libre ang adoption kon gikan sa DSWD, apan gipahibawo sa mga opisyal niini nga di dali-dali ang proseso niini.
Matod ni Clavel Saycon, adoption focal person sa DSWD 7, nga nahibawo na ang awtoridad hilabi na ang pulis kon kadudahan ang usa ka langyaw nga magdala og batan-on sa pantalan ug tugpahanan.
Kinahanglan usab nga magsugod sa barangay kapitan ug konseho ang responsibilidad sa pag-report sa kadudahan nga mga gibuhat sa usa ka langyaw.
Si Leah Quintana, tigpamaba sa DSWD 7, nagkanayon nga bisan kon daghang tourist destination sa Central Visayas ug dagsaon sa turista ang hotels, apan manginlabot usab dapat ang mga tagdumala sa hotel kon adunay kadudahan nga masayran.
Dugang ni Quintana nga di lang sa ahensiya sa gobyerno ang responsibilidad sa pagpakgang sa human trafficking, apan lakip ang komunidad niini.
Nagkinahanglan og travel clearance ang menor de edad gikan sa DSWD sa di pa makagawas sa nasod.