DI momenos 50 ka mga tawo ang nagtapok kagahapon aron ipakita ang ilang pagsupak sa planong pagtukod sa 300-megawatt coal fired thermal power plant sa Ludo Power Corporation sa barangay Sawang Calero, dakbayan sa Sugbo.
Ang grupo pinangulohan sa Akbayan Youth, Alliance of S.I.R. beneficiaries, Environmental Legal Assistance Center, Freedom from Debt Coalition, Kaabag sa Sugbo Foundation, Missionaries of the Poor, Pagtambayayong Foundation, Philippine Earth Justice Center, Philippine Movement for Climate Change kinsa nipahigayon og hamubo nga programa sa Sawang Calero.
Ilang gipadayag ang ilang pagsupak sanglit ilang gituohan nga makadaot ang maong proyekto sa panglawas mga tawo partikular sa mga nagpuyo palibot sa lugar diin tukoron ang maong proyekto.
Matod ni Engr. Kenny Silud, taga Sawang Calero nga ang hugaw, mahal ug makamatay ang coal kun uling mao nga pabor sila sa renewable energy.
Si Father Rowell Gumalay, kinsa maoy tagdumala sa Missionaries of the Poor, nagkanayon nga kon madayon ang maong proyekto, sila maoy grabeng maapektuhan ug ang mga special children nga anaa sa ilang kustodiya.
Human sa programa ang mga tawo nagbitbit og placards ug niadto atubangan sa kasamtangang planta sa Ludo sa maong barangay ug nagsaygit siyagit og “no to coal”.
Si Nelso Yuvallos sa LPC, nihangop sa protesta sa maong grupo.
Siya nipasalig nga tabangan sa Ludo ang mga residente ug mga tawo nga posibleng maapektuhan aron mahatagan og solusyon ang ilang problema sa maong proyekto.
Matod ni Yuvallos nga sinsero ang ilang kompaniya sa pagsunod sa mga lagda sa Department of Environment and Natural Resources (DENR) aron di mabutang sa peligro ang kinabuhi sa mga tawo nga nagpuyo sa maong barangay ug sa kinaiyahan.
Gipadayag niya nga andam ang LPC nga maminaw sa ilang mga problema aron mahatagan kini og solusyon.
Gibutyag ni Yuvallos nga sayop ang pagtuo sa mga tawo makamatay ang coal sanglit walay abog nga manlupad, di sab kini makamugna og kasaba (langas) sa lugar.
Di usab kini makapatay sa mga isda. inay makadaghan sa production sa isda sama sa ilang planta sa Pangasinan sanglit ang ilang planta mogamit sa modernong teknolohiya.
Kini di sama sa mga planta nga makita sa internet nga nakalapas sa lagda sa gobiyerno.
Ang City Council pinaagi sa 10-4 nga botasyon, niduso niini ngadto sa Department of Environment and Natural Resources (DENR 7) human ang zoning board niindurso sa ilang pagtugot aron himuong industrial nga yuta ang nahimutangan sa Ludo para sila makatukod sa planta.