NAILHAN na ang duha ka gikatahapang killers ug utok sa pagpatay sa usa ka abogada nga gi-ambush sa dakbayan sa Tagbilaran niadtong Miyerkules sa hapon.
Away sa yuta sa usa ka pamilya nga nanag-iya og resort sa isla sa Panglao ang gitumbok sa kapulisan nga maoy motibo sa pagpatay kang manlalaban Mia Mascariñas-Green.
Kagahapon sa kaadlawon, gironda sa kapulisan sa Tagbilaran ang resort nga gipuy-an sa mga suspek nga giila nga sila si Romarico Benigian ug Lloyd Lancer Gonzaga, apan wa na nila maabti.
Ang korte sa Bohol miisyo og search warrant batok kang Benigian nga nag-ukopar sa usa ka lawak sa resort, diin kini kasamtangan nga nagtago human nila banhigi si Green.
Nakakuha hinuon sila og usa ka kalibre .38 revolver ug duha ka mga bala niini, Ingram ug kalibre .45 nga pistola ug usa ka granada ingon man pakete sa gituohang shabu.
Matod ni Police Supt. Nicomedes Olaivar Jr. hepe sa Tagbilaran City police station nga nahinabi sa mga tigbalita, usa si Benigian sa gitudlo nga nagbanhig sa abogada sa mga saksi.
Siya positibong giila pinaagi sa iyang hulagway nga gipakita sa kapulisan sa mga saksi.
Si Olaivar nibutyag sa mga ngan nila ni Benigian ug Gonzaga sa interbyu sa sibyaanang dyTR kagahapon sa hapon.
Nilusad og manhunt operation ang Special Investigation Task Group nga gilangkuban sa Criminal Investigation and Detection Group (CIDG 7), National Bureau of Investigation (NBI) 7, Bohol Provincial Police Office ug Tagbilaran City police station.
Nagtuo ang kapulisan nga naa pa sila si Benigian sanglit hugot karon ang ilang pagbantay sa tanang posibling agian sa mga suspek.
Gitug-an ni Olaivar nga ang gihuptan nga kaso ni Green sa panag-away sa yuta sa usa ka beach resort sa lungsod sa Panglao sa usa ka iladong pamilya ang hinungdan sa krimen.
Ilang nasubay nga ang mastermind umagad ra usab sa kliyente ni Green.
Ang utok giingong hapit na mapildi sa kaso.
“Init kaayo ang kaso. Kapildihon na sila tungod sa mga ebedensya nga na-prove na gyud nga ang real owner is kadtong ugangan. So, nakabantay na sila nga helpless na ilang kaso, mao nga nanabla sila. Ilang giplano ang pagpatay sa attorney,” matod ni Olaivar sa samang interview.
Una nang nireklamo ang kliyente ni Green kaniya human nga ang duha ka armadong mga lalake gipapuyo sa resort nga gipanag-iya ra usab sa mastermind ug kanunay nga manghadlok ug mopakita sa armas.
Ang giingong umagad nga lalake sa kliyente ni Green ang gituohan karon sa kapulisan nga maoy mastermind nunot sa positibong pag-ila sa mga saksi lakip na ang kauban sa biktima sulod sa sakyanan nga maoy naka may-ong sa mga killer.
Dugang sa imbestigasyon sa kapulisan nga ang mga suspek giingong lumad nga taga Davao region apan naa na sa Bohol nanimuyo ug higala sa mastermind.
Giingong nalambigit usab sa illegal ang maong mga suspek ug modawat og tanyag sa pagpamusil ug tawo aron dunay ikasustiner sa ilang bisyo.
Nadakpan na sila si Gonzaga ug Benigian sa kasong paghupot og drugas.
Sa ocular inspection sa kapulisan, way naka montar nga CCTV camera sa dapit apan gidasig ni Chief Supt. Noli Taliño ang SITG nga mosusi sa mga establisemento nga duol sa lugar nga nahitaboan kon makita ba ang mga huylagway sa mga suspek.
Una nang mipahibawo ang Tagbilaran police nga dunay kapin sa upat ka mga tawo ang nagbanhig kang Green samtang dunay nagsilbing lookout sa dapit.