PATAY ang duha ka mga driver human nagsungag ang ilang gimaneho nga mga motorsiklo niadtong Huwebes sa gabii sa Barangay Danao, lungsod sa Jasaan, Misamis Oriental.
Giila ang mga biktima nga mao sila si Randy Dael, taga Barangay Solana, susamang lungsod, kinsa nagmaneho sa Kimco nga motorsiklo ug laing biktima nga giilang si Ronnie Lacsi, hingkod ang edad, taga Barangay Binitinan, lungsod sa Balingasag, Misamis Oriental, kinsa driver usa sa Honda XRM.
Bali sa tuong tiil usab ang naangkon sa backrider ni Dael nga mao si Raquel Eduave, hingkod ang edad, residente sa susamang dapit.
Sa inisyal nga imbestigasyon ni PO3 Archie Illajas sa Jasaan Police Station, nasuta nga si Dael paingon unta niadtong tungora sa direksyon sa Cagayan de Oro samtang paingon sab sa Balingasag nga bahin si Lacsi dihang kalit lang nga nagsungag ang duha.
Tungod sa kusog nga impact, maayong pagkapiyahok sa nawong ni Dael samtang bun-og ug bali sa lain laing parte sa lawas ang naangkon ni Lacsi.
Pulos nga gipangdala ang mga biktima sa Jasaan Community Hospital apan pulos gideklarang dead on arrival ang duha ka mga driver.
Matud ni Illajas nga ila pa giimbestigahan ning panahona nganong nagsungag ang duha nga luag man kaayo ang dalan ug anaa pa sila sa opposite nga direksyon niadtong tungora.
Walay nakasaksi sa insidente apan ang pipila ka mga trabahante sa usa ka resort sa dapit miingon nga kusog lamang nga buto ilang nadungog.
Adunay nagtuo nga adunay nalambigit nga laing sakyanan sa dapit nga posibleng adunay mi-overtake nga motorsiklo nga maoy hinungdan sa pagsungag nga gikamatay sa duha ka mga driver.
Dili pa usab mahinabi sa mga polis si Eduave labina padayon pa kining gitambalan sa usa ka balay tambalanan ning siyudad sa Cagayan de Oro.