NAKABUYLO na ang klase sa mga publikong eskwelahan sukad niadtong Lunes.  Sama sa naandan dunay mga ginagmay nga kakulian sama sa mga classroom nga nagkulang.  Pero tungod kay naanad  nata wa ni makapugong sa mga principal ug magtutudlo pagpangita ug paagi. Sama sa double shifting. Dunaybuntagon unya duna say hapunon nga klase. Mao ni ang naandan nga sulbad sukad pa kaniadto.

Sunog

Sa ika duhang adlaw sa klase dunay mga classroom nga naapiki didto sa lungsod sa Dumanjug. Duha ka classroom sa Dumanjug National High School ang nasugamak og ginagmay nga sunog samtang laing upat ka classroom sa silingan nga Dumanjug Central School mao sab ang nahiagoman. Sumala sa mga bombero gituyo pagsunog ang mga libro, kurtina ug ubang kagamitan. Nabalda og gamay ang klase. Samtang didto sa Balao Elementary School mga tinun-an ug  magtutudlo nagtinabangay pagpawong sa nasunog nga dakong punoan sa kawayan nga nahimutang  duol sa ilang eskwelahan.

Suerte kay dali nila kining napawong uban sa mga  bombero nga niresponde. Kay kon wa pa, delikadong maapil ang balay nga naa sa palibot.  Distantansiya ra hinuon ang eskwelahan gikan sa kawayanan

Drill

Ning panahon sa huwaw ang alarma sa sunog  bantayanan. Mao nga ang labing una nga fire drill sa pagbukas sa klase nahitabo didto sa Cebu City Central School pagka Miyerkules. Lima ka libo kapin ka tinun-an ug magtutudlo ang nisalmot nga gipangulohan ni Lyra Illaga ang ilang principal. Samtang ang mga bombero sa Pahina Central Fire Station gipangulohan ni SFO4 Emmanuel Cabos. Usa ka fire truck ang  nisud sa eskwelahan kay nitubag og alarma.  Nakita ni sa mga bata nga gi-giyahan  sa ilang mga magtutudlo sa pagkanaug padung sa quadrangle. Dunay mga obserbasyon ang mga bombero nga gipadayag pagsiguro nga kon tinud-anay na gyud nga alarma ang masugatan kaminosan ang disgrasya ug kabalaka.

Hard hat

Ako nga usa sa nisaksi nakakita sa dakong panginahanglan nga sa ingon ini nga alarma kinahanglan nga hatagan og protection ang ulo sa mga bata. Akong girekomendar ang pagsul-ob og hard hat. Sama anang gigamit sa mga construction worker. Dako kaayo ang bintaha kon nagsul-ub sila ini kay kon magkinaunsa di mameligro ang ilang ulo. Labi na kon dunay linog.

Sila si Baltazar Tribunalo ug Simeon Romarate angatong mga pangulo sa Disaster Risk Reduction nihangop sa maong ideya ilabi na kay di ni mahal kaayo itandi sa ubang protective gears. Si Matt Alolod, presidente sa PTA sa City Central, nipasalig nga iyang awhagon ang mga ginikanan pagpalit ini pagsiguro sa kaluwasan sa ilang mga anak panahon sa emerhensiya.