LAIN na usab nga langyaw ang nadakpan human masakpi nga nakig-sex og mga menor bugti sa salapi.
Naabtan pa sa mga otoridad si Harold Glover, 69 anyos nga American retiree, nga padung na usab unta nga makig-sex og laing mga babayeng menor. Nahushus na ang iyang short pants sa pag-abot sa mga otoridad.
Nahibaw-an ang modus ni Glover dihang usa ka 16 anyos nga babaye nitug-an sa Children’s Legal Bureau sa gibuhat sa langyaw kaniya. Dunay usa ka babayeng bugaw nga nidani kaniya sa pagpakighilawas sa langyaw, matod sa dalaga, bugti sa bayad.
Matod sa dalaga nga siya napugos kay nanginahanglan siya og kwarta aron ikapalit og school supplies.
Sa mga pagtuon, ang human trafficking nahitabo sa mga nasod nga kabos, sama sa Pilipinas. Sagad sa mga biktima mao kadtong nanginahanglan kaayo og kuwarta, sama sa 16 anyos nga nitahan sa iyang pagkababaye aron dunay ikapalit og school supply sa pagbukas sa klase.
Si Glover usa lang sa mga langyaw nga nadakpan tungod sa human trafficking dinhi sa Sugbo. Ang uban sa mga langyaw gidakop tungod kay dunay kuyog nga mga menor sa ilang paglakaw.
Kini subsob ug gihingusgang kampanya batok sa human trafficking igo nang pahimangno niadtong dugay na niining mao nga buhat.
Sa pagkakaron, sila nakatago pa, wa mabutyag ang imong linuog nga buhat sa pagpamiktima sa mga huyang ug inosente.
Apan di kanunay malihayan ang balaud, sa madugay o madali, maabtan ug madakpan ra ang mga human trafficker.