COTABATO CITY -- Patay na nga nabangalan ang usa ka dalaga human naghikog, alas 6:45 sa gabii niadtong Huwebes, Pebrero 16.

Giila ang biktima nga si Mary Ann Abalde, 27, cashier sa Saint Benedict College ug molupyo sa Notre Dame Village, Barangay Rosary Heights sa dakbayan.

Matud ni Cotabato City Police Office Director Victor Valencia nga gabii na nga miabot ang ginikanan sa dalaga gikan sa ilang uma sa Maguindanao Province.

Sa diha nga gitawag na ang biktima sa iyang mga igsuon aron manihapon, wala kini mitubag sulod sa kuwarto.

Sa diha nga gi-ablihan sa iyang mga igsuon ang kuwarto, dako ang ilang kakurat gumikan nagbitay na ang biktima sa kisame nga bahin sa balay pinaagi sa paghigot sa iyang liog og nylon cord.

Sa wala pa mahitabo ang paghikog, nakasulti pa ang biktima sa iyang ginikanan nga dili mahinayon ang iyang kasal sa hinigugma sa bulan sa Abril gumikan kay nagtaban kini og laing babaye kinsa giingong buntis na.

Posibleng wala maka-aguwanta si Abalde sa iyang gibati sa gisangputan sa ilang gitakdang kaminyuon hinungdan nga nagpakamatay.

Kapulisan nagseguro nga walay foul play sa gidangatan sa biktima.