HUMAN walo ka adlaw nga pahulay, nagharong na gyud ang nanguna sa tim sa NBA nga pulos puno og "stars" apan usa lang ang nagpabilin sa duwa sulod 53 minutos.

Si Stephen Curry mitala og 26 puntos ug walo ka assists, ug gibigwasan sa Golden State Warriors si LeBron James ug ang Cleveland Cavaliers sa kulbahinam nga kadaugan, 108-100, sa overtime sa Game 1 sa NBA Finals kagahapong adlawa.

Sa finals sa unang higayon sud 40 tuig, nahatagan na sa Warriors ang ginahulat sa fans.

Migukod sila gikan sa 14 puntos nga lamang ug wa nakasagbang ang finals-best 44 puntos gikan kang James ug napahilom ang Cleveland.

Mihimo sab si James og walo ka rebounds ug unom ka assists sulod sa 46 minutos apan ang four-time MVP nasipyat sa pag-iskor hangtud nahuman ang duwa ug napadulong kini sa overtime.

"We got to do more around him," ni Cavs coach David Blatt.

Mihamok sab ang kaguol sa Cavs human ang point guard nga si Kyrie Irving nagkaproblema sa wala nga tuhod sa overtime hinungdan nga wala na kini nakaduwa og balik.

Samtang wala pa masuta kung unsa ang estado karon ni Irving alang sa Game 2.