PANTUKAN, Compostela Valley Province -- Patay na dihang miabot sa tambalanan ang usa ka lalaki human gipusil sa Purok 1, Sitio Lease, Barangay Fuentes, alas 11:30 sa buntag, Huwebes, Pebrero 16.

Si Police Officer 2 Charlie James Ranalan sa Pantukan Municipal Police Station nag-ila sa biktima nga si Edwin Catog, 44, nagpuyo sa Purok 1, Sitio Lease, Barangay Fuentes, Pantukan.

Inisyal nga imbestigasyon sa kapulisan nagbutyag nga ang biktima kauban sa duha ka mga lalaki nagduwa og baraha sa nasangpit nga lugar.

Usa ka wala mailhing lalaki ang mibutho ug gipusil ang biktima sa makadaghang higayon.

Nahiagom og mga samad punusilan sa nagkadaiyang bahin sa lawas ang biktima.

Dihang nahagba ang biktima, paspas nga miiktad ang suspek paingon sa wala matinong lugar lulan sa usa ka motorsiklo.

Gisuwayan pa pagdala ngadto sa Compostela Valley Provincial Hospital sa Kingking, Pantukan, ang biktima apan gideklara nga dead on arrival.

Gilayong miresponde ang kapulisan ug naglusad og hot pursuit operation apan wala na igkita ang suspek.

Kapulisan nakarekober og upat ka basiyo sa bala sa kalibre .45 nga pistola. Apan hangtud Biyernes, wala pay natumbok nga suspek ang kapulisan.