KIBLAWAN, Davao del Sur -- Lain na sab nga usher sa ilegal nga “Last Two” ang nasikop sa kapulisan human naaktuhang nagpataya, alas 6:30 sa gabii, Huwebes, Pebrero 16.
Ang nasikop mao si Lucena Masamloc Aballe, sa Purok Gumamela, Barangay Isidro sa lugar human naaktuhang nangolekta og taya sa Last Two.
Nakumpiska gikan sa posisyon sa suspek ang mga paraphernalia sa sugal hinungdan nga gamiton kining ebidensiya sa kasong atubangon niini.
Way nahimo ang suspek human gipadlak dayon kini sa selda sa kapulisan dungan sa pagpasaka og kasong paglapas sa Illegal Gambling Law sa nasud.
Hugot nga nagpasidaan ang kapulisan sa mga tawong padayong nagduwa sa ilegal nga sugal nga moundang na lamang aron di sila makompromiso sa taknang madakpan.
Gipakusgan na sa kapulisan ang paggukod sa mga tigpataya og Last Two subay sa mandato sa nasyonal nga gobyerno nga sumpuon na ang tanang ilegal nga sugal sa nasud.