Tambagi ko Noy Kulas: Di makadungog, nahigugma

Dear Noy Kulas,

Dunay lang koy gamay nga problema. Kini maoy nakapahasol nako. Naa koy nauyab sa text ra apan nagkita mi. Ganahan siya nako kay cute kuno ko ug sweet. Ang problema kay deaf ko.

Maguwang siya nako. Unsa man ang akong buhaton, Noy? Ako siyang sultihan nga ingon ani ko? Naka-feel na ra ba kog love ani niya. Apan iyang sulti kay bata pa daw ko pero kon bulatikan og text, maora man og kiligon.

Hinaot nga imo kong matambagan. Daghang salamat.

DJ

DJ,

Kon di nimo siya sultihan ug magkauyab mo, iya ra gihapon ning mahibaw-an. Di nimo ni matago gikan kaniya kay mosugot ka o di, mabantayan ra ni. Ako gani nga usahay mabungol usab tungod sa akong rhinitis, makabantay man gani ang akong pamilya nga di kaayo ko makadungog. Unsa na kaha ka nga bungol gyud? Kon di mo mag-atubang, di ka makahibawo unsay iyang gisulti o gibuhat.

Busa, samtang sayo pa, mas maayong imo siyang sultihan nianing imong problema. Pinaagi usab niini, imong mahibaw-an kon tinuod ba siyang nahigugma kanimo. Basin sa physical lang kutob ang iyang ganahan nimo, di ang kinatibuk-ang ikaw. Kon makadawat siya nga ikaw bungol, anha diha nimo makita ang tinud-anay nga gugma.

Mahadlok kang mawala siya gikan kanimo kon imo siyang sultihan? Mas maayo nga mahitabo kini samtang sayo pa kay sa mahitabo kini nga lawom na ang inyong relasyon ug diha ka na niya biyaan. Besides, ang pagkabungol makorihian man pinaagi sa hearing aid. Hinuon sa akong pagtuo wa ka masul-ob niini kay mauwaw ka tingali. Ang pagkabungol di angay ikauwaw kay natural ra man na. Wa ka man usab maghasol og laing tawo.

Kon unsa man ang resulta sa imong pagsulti unya niya, dawata kini.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph