ILIGAN CITY -- Patay ang 39 anyos nga una na'ng mi-surender sa Oplan Tokhang sa kapulisan, human kini gipusil sa wala mailang mga suspek, alas 9 kapin sa gabii, Pebrero 15, sa Purok Masidlakon, Barangay Mahayahay, ning dakbayan.

Naila ang biktima nga si Raymond Oguin Logroño, nga naila usab nga “Mon-mon” sa dapit, dunay kapuyo, walay trabaho base sa report sa Iligan City Police Station 4, taga-Purok Love and Devotion, sakop sa nahisgutang barangay.

Nakalatid sa report sa Police Station 4, nagdula og computer ang biktima dihang miabot ang duha ka wala mailang mga lalaki nga nagsuot pa og helmet, ang usa nila adunay dala'ng kalibre .45 nga pistola. Nangutana pa kini kon kinsa si Mon-mon.

Tungod sa kahadlok sa mga naa sa palibot, nagdinaganay na sila aron motago ug nadunggan nalang nila ang tulo ka buto sa armas.

Tulo ka samad-pinusilan sa mata, sa li-og ug sa hawak ang naangkon sa biktima nga maoy hinungdan sa iyang hinanaling kamatayon.

Misibat ang mga suspek sakay sa duha ka mga motorsiklo nga naghulat sa unahan. Paingon sa highway sa Mahayahay ang direksiyon sa ilang pag-eskapo.

Dugang sa police report nga iladong “drug personality” sa dapit si Logroño apan mitahan na kini sa iyang kaugalingon atol sa Oplan Tokhang sa kapulisan.