ILIGAN CITY -- Andam na ang kagamhanang lokal ning dakbayan alang sa synchronized o dungan nga election sa mga purok president sa 1,003 ka mga purok sa 44 ka mga barangay ning dakbayan karong Sabado, Pebrero 18.

Ang Executive Order (EO) 6, series of 2017 ni Mayor Celso Regencia nagmando sa maong piniliay human makit-an, matud pa, sa iyang buhatan nga duna nay daghang mga kasamtangang presidente sa purok nga dili na epektibo sa ilang posisyon.

“The concerns of peace and order, barangay development, social welfare and governance of the grassroots could be best served if the local leaders of the barangays, which include the purok presidents, are tapped and/or harnessed to assist the local chief executive in the administration of the activities pertaining to the puroks,” nakalatid sa nasangpit nga EO.

Matud ni City Information Officer Joe Pantoja nga kapin 1,800 ang mi-file sa ilang kandidatura aron magpapili sa pagka-presidente sa purok.

Naa sa EO sa mayor nga ang boto alang sa pagka-presidente mao na usab kini ang boto alang sa iyang gipili nga bise presidente, sekretarya ug tresurera.

Usa ka representante sa matag pamilya lamang ang makaboto. Kon dunay duha o tulo ka managlahing pamilya ang nagpuyo sa usa ka balay, gikonsidera sila nga duha o tulo ka pamilya.

“But they are identified and certified by the owner of the house, a purok official and the barangay council nga managlahi sila nga pamilya,” pagpaklaro ni Pantoja.

Kon adunay purok nga walay mikandidato pagka-presidente, mag-appoint ang mayor.

“Kung mahitabo nga mag-failure of elections, mag-appoint usab ang mayor,” dugang ni Pantoja.

Ang Purok Election Committee maoy mo-recommend nga “failure of election” sa usa ka purok, pinaagi sa assessment sa kapulisan.

“Madeklara ang failure of election kung dunay kagubot nga nakapahunong sa pagbotar,” miingon si Pantoja.

Magsugod ang pagbotar alas 8:30 sa buntag ug matapos alas 4 sa hapon ug ipahigayon kini sa mga tunghaan o sa mga barangay covered court.

Isunod ang “counting of votes” ug ang proklamasyon sa mga mananaug kung asa gihimo ang pagbotar.

Ang mass oath taking, nga pangunahan ni Regencia, itakda sa City Mayor's Office sa umaabot nga mga adlaw.