MALAMPUSONG nasikop pinaagi sa upat ka warrant of arrest ang suspetsado sa tinugyanan sa kapolisan niadtong Huwebes, Pebrero 16, sa Tirso-Neri Street, dakbayan sa Cagayan de Oro.

Ang suspek naila nga si Ma. Dorothea Chi, 30, residente sa Magsaysay Street, Barangay 18 ning dakbayan.

Sa nahipos nga impormasiyon gikan sa Police Station 1 sa Divisoria, ubos ni Police Senior Inspector Maricris Mulat, nasikop ang dinakpan pinaagi sa upat niini ka warrant of arrest.

Duha niini ang qualified trafficking in persons nga gi-isyu ni Honorable Judge Jose Escobido, presiding judge sa Regional Trial Court sa Misamis Oriental Branch 37, ug ni Honorable Judge Richard Mordeno sa Branch 22 ning dakbayan.

Samtang ang laing duha usab ka kaso gi-isyu ni Honorable Judge Evelyn Gamotin sa Branch 19 ning dakbayan ug ni Honorable Judge Jose Escobido, Branch 37 ning dakbayan diin pulos niini walay piyansa.

Gibutyag usab ni Mulat nga taod-taod na nila nga gipangita ang suspek.

Giingong nakadungog usab sila og report nga atubangon sa suspek ang maong kaso.

“Kadlawon pa nagsugod na mi og operation ug tanan posible niya puy-an among gi-adtoan,” pahayag ni Mulat.

Nasayran nga gi-akusahan ang suspek nga kauban nila ni Peter Gerard Scully, Australian national nga usa ka pedophile, kinsa nagtingkagol sa City Jail sukad niadtong tuig 2015 nga nag-atubang sa 75 ka mga kaso samtang ang kaipon nga si Liezyl Margallo nasikop niadtong milabay nga bulan sa Malapascua, Cebu.

Masuta usab nga grabe ang pag-viral sa mga linuog nga video diha sa social media nga gihimo sa mga suspetsado diin gimolestiya ug gipangmaltrato nga mga biktima.

Sa pagkakaron, nakatala na sa buhatan ang insidente samtang ang suspek ang anaa na sa tinugyanan sa kapolisan.