NASIKOP sulod lamang sa usa ka adlaw ang upat ka mga giingong wanted person sa dakbayan sa El Salvador atol sa gihimong one-time, big-time operation sa El Salvador City Police Station.
Giila ang mga dinakpan nga sila si Raul Abuhan kinsa nag-atubang og kasong frustrated homicide, Rolando Neri nga nag-atubang sab og kasong highway robbery, Jenoven Pahac sa kasong qualified theft, ug Mel Batan ang 59 anyos nga babaye nga adunay kasong estafa.
Gibutyag ni El Salvador City Police Station Chief Jerry Tambis nga pokos sila ning panahona sa pagpangsikop sa mga wanted person sa ilang lugar.
Lakip na niini ang bisan kinsang tao nga aduna pay laing mga kasupakan.
Giingong ang mga dinakpan ang taod-taod na nga gi-monitor ug gitouhang gikalimtan ang ilang gikalambigitan nga kaso hinungdan nga kumpiyansa lang sa ilang kaugalingon.
Kon kaniadto labihan ang ilang atensyon sa giyera kontra droga, karong panahona mas ilang gitutokan kining mga pipila ka laing mga kaso sama sa pagpangawat, pagpanulis, ug uban pa.
Nagpadayon sab ang pagpang-apod apod sa mga sakop niini og mga materyales kon mga tips aron dili mabiktima sa bisan unsang matang sa krimen. (SVB)