NALISANG ang mga pasaherong babaye dihang nakitang gipagawas sa usa ka lalaki ang iyang kinatawo ug gidula-dulaan sa ilang atubangan samtang anaa sa dyip niadtong Biyernes sa buntag, Pebrero 17.

Ang suspek naila nga si Allan (bansagon gitago), residente sa Barangay Carmen, dakbayan sa Cagayan de Oro.

Sa impormasiyon, nasayran nga samtang anaa sulod sa pasaheroan nga dyip ang lalaki ug atbang niini ang tulo ka mga babaye, kalit lang nga gi-ablihan ang zipper sa shorts ug gipagawas ang kinatawo ug gidula-dulaan.

Usa ka tinun-an sa Criminology kinsa nakasaksi sa gihimo sa suspek ang nitaho sa Police Station 4 sa Carmen.

“Tapad nako ning laki, naay tulo ka babaye nga atbang. Natingala ko kay nikalit lang og balhin ang usa ka babaye sa akong tapad kadto sa iyang atbang, dayon gisinyasan niya ang isa ka babaye nga ipabalhin gihapon. Natingala ko kung unsa ma’y naa sa ilang atbang mao gilili nako ang lalaki, gipagawas niya iyang kinatawo ug iyang gi-masturbate,” pahayag sa saksi.

Nasayran nga gisabot niini ang mga otoridad nga mag-atang sa KSY sa Carmen ug mosinyas lang kini kon maabot na sa maong dapit apan bisan nga wala pa makahunong ang dyip kalit nga mikanaog ang suspetsado.

Natumba pa kini kay lage gadagan paman ang dyip hinungdan nga gisikop kini sa nagpakabanang katawhan pinaagi sa citizen’s arrest kinsa misulay pa sa pagsukol.

Sa bahin sa suspek, gipanghimakak niini ang alegasiyon ug niingon nga gikan lang siya nga nangihi ug wala matud kini gihimo nga dautan.

Sa pagkakaron, ang suspek ang kasamtangang giimbestigahan pa sa kapolisan sa Police Station 4.