DI MALIKAYAN nga duna gyuy batasan ang tawo sa pagkamahimantayon nga maoy manguna sa istorya aron dunay mahimong pulutan sa paghisgut sa usa ka tapok.

Hinuon, maingon nako sa iyang kinabuhi karon nga guwapa siya tungod sa tabang sa mga tambal aron mohayag ug moanyag ang iyang pamanit. Babaye sab siyang tawgon tungod sa iyang panagway ug pigura sa lawas gikan sa pagkalalaki ug nahimong babaye. Sa laktud, bayot siya.

Ilado siya sa iyang pagkaanyag, buotan pero di matago sa iyang batasan ang pagkahimantayon, di na lang subayon kung unsay iyang gigikanan.

Sayunan ka'g mokalit lang og pangutana sa iyang mga nakaatbang nga, "NAMAYAT NA LAGI KA?" Hinuon, pipila masubo sab baya nga wa sila nagpahalata tungod nabalaka sa ilang kahimtang. Apan kung buot subayon, himsog pa ang uban itandi kaniya.

Konotasyon sa iyang pangutana mao ang "balatian" kon sakit, naay gihambin nga di maayong gibati, ug di maayong kahimtang. Di ba kini ang imong buot ipasabot sa imong mga panguntana?

Nabalaka man god ang kadaghanan labi na kung ikaw binabaye gumikan sa pagkatag sa balatian nga Human Immunodeficiency Virus (HIV) usa ka lentivirus (usa ka laing grupo sa retrovirus) nga maoy hinungdan sa sakit nga Acquired Immunodeficiency Syndrome (Aids).

Hinuon, walay makapugong kaniya kung siya mangutana, gani nagpasalamat ang iyang mga kaubanan sa tapok kay daw nabalaka nga kinahanglan mag-igmat gumikan sa pagkatag sa maong balatian kung di luwas ang pakighilawas.

Wa ko pasakop nga mitaas akong kilay sa iyang pagpangutana sa usa ka bayot, nakahinuklog hinuon ko, uban sa pagpahiyom og diyutay ug nakaingon sa kaugalingon sa huna-huna, "unsaon na lang ka, kung namayat sila? Tan-awa imong gigikanan, uy."

Sama niya, daw nag-asoy sa mga butang nga kinahanglan untang itago, nga maoy gitan-aw nga hinungdan sa City Health Office (CHO) nga gamay ra ang mipailawon sa HIV-testing sa dakbayan.

Gamay ang nagpa-test tungod nabalaka nga kung anaa na kanila ang maong sakit, basin unya og tamak-tamakan na sila sa komunidad, apan kinahanglan nga magpa-HIV test gayud.

Sa pakighinabi sa Bombo Radyo Davao, sa nakalabay nga semana sa usa ka tigpamaba sa CHO, gibutyag niini nga wa nagpasabot nga namayat ka o naa kay gibati nga sakit, HIV positive na ka. Gani kini ang nahimong babag nga magpa-HIV test ang pipila tungod daw nahadlok na og masayran nila nga naa sila niini nga balatian.

Balik sa iyang pangutana nga, "NAMAYAT LAGI KA?" Usa ba kaha kini ka dakong tabang aron dalhon ang usa ka higala sa pagpa-HIV test?

Sa akong tan-aw, mamahimong mao sab, nakadayeg ko sa iyang gihimo, kay sa iyang pangutana, nabalaka ang iyang gipangutan-an kay usahay kauban sila sa krimen nga posibleng mohatud sa HIV, di ba tama ko, Ms. NAMAYAT LAGI KA?

Mga higala, nahimo lamang ko kini nga tipik sab sa akong mga kagahapon, tungod nakapadasig ug nakapaaghat siya sa uban niya nga mga higala nga magpa-HIV test, tungod niini, nakatabang siya sa kampanya sa CHO batok sa pagkuyanap sa HIV.

Nasayop lamang gyud ko, kay duna diay kapuslanan ang pagkahimantayon. Naigo ka? Ayaw'g kasuko "Antey" ha, kay nagpakabana ka. Di ba tama ko, Antey?